Sýretti túsirgen – Jangeldi ÁBDIǴALYM
Joǵary dárejeli marapatty tabystaǵan aımaq basshysy Aıbardyń erligin aıta ótip, quttyqtaýyn jetkizdi.
– Aıbar qyraǵylyq tanytty. Ol osy shahtada bolýy múmkin qaıǵyly oqıǵanyń aldyn aldy. El Prezıdenti marapattaý týraly sheshim qabyldady. Shyn júrekten quttyqtaımyz! Eren eńbegińiz úshin rahmet, ata-anańyzǵa osyndaı eńbekqor ul tárbıelegeni úshin alǵys aıtamyz, – dedi E.Qabdýlauly.
«Qarmet» kompanııasynyń basshylyǵy da qyzmetkerlerin memlekettik nagradamen quttyqtap, aqjarma alǵysyn bildirdi.
О́z kezeginde memlekettik marapat alyp mereıi tasyǵan Aıbar Qosanov el Prezıdentine elengen eńbegi úshin jáne joǵary marapaty úshin iltıpat sózin jetkizdi.
– Men úshin bul kútpegen tosyn ári qýanyshty jaǵdaı. Bul bizdiń búkil ujymnyń ortaq syıy dep bilemin. Sol kúni men ádettegideı jumysymdy atqaryp júrgen edim. Oqystan taraǵan tútin týraly estigen bette birden 700 metrge tura júgirdim. Qaýlaǵan qara tútindi kórgende eki órt sóndirgishti alyp, oshaqqa qaraı umtyldym. Sol kezde eshteńe oılap ta úlgermedim. Bar oıym tek ondaǵy adamdardy qutqarý edi, – deıdi marapat ıesi.
Aıbar Qosanov – Shet aýdanynyń týmasy. 38 jasta. Kostenko shahtasynyń elektroslesari bolyp jumys istep kele jatqanyna úsh jyl boldy. Otbasynda eki bala tárbıelep otyr.
Kostenko atyndaǵy shahta dırektory Denıs Dymovtyń aıtýynsha, mundaı áreketke kez kelgen adam bara bermeıdi. Qaýipsiz jerden 750 metrlik tómendiktegi oqıǵa oshaǵyna deıin janushyryp barý – kózsiz erlik. Ol shapshań áreket etip, konveıer shtregindegi tútindi jalǵyz ózi aýyzdyqtaǵan. Bul, tipti, onyń mindetine kirmeıdi eken.
Esterińizge sala keteıik, 2 mamyr kúni keshkilik Kostenko atyndaǵy shahtadaǵy K3 qabatynyń 4-konveıerlik shtreginiń aınalasynan tútin shyqqan. Jedel áreket nátıjesinde oqys jaǵdaı tez arada joıylǵan. Bul rette evakýasııalaý josparyn engizý ári kenshilerdi jer betine shyǵarý týraly shuǵyl sheshim qabyldandy.
Bul jaǵdaıdyń oryn alý sebebi tómengi keneptiń rolıgine bógde zattyń túsýi bolyp shyqty. Rolıktiń jumysy buǵattalyp, saldarynan konveıer taspasynda tútin taraǵan.
Qaraǵandy oblysy
