Áke-sheshesinen alty aılyq sábı kezinde aıyrylǵan ákem Mektep Dúısembıev te taǵdyr tartqan synaqtan syrt aınalyp ótken joq. Perishte kezinde jetim qalǵan ákemdi týys jeńgesi baýyryna basty, baqty-qaqty. Eshkimnen kem qylmaı ósirdi.
19 jasqa taıaǵan shaǵynda ákem Tashkent shahary arqyly maıdan dalasyna shaqyrtý aldy. Ol kisi on úshinshi mehanıkalandyrylǵan tank dıvızııasynyń saper vzvodynyń quramynda komandır boldy. Qart qurlyqty jaıaý júrip, Otan qorǵady. Baıyrǵy Lenıngradty, Novgorod mańy men Vyrý qalasyn jáne Estonııa aýmaǵyn jaý tastaǵan mınadan tazartýǵa kúsh saldy. Ol týǵan topyraǵyna 1954 jyly Aýstrııadan oraldy.
Qatal taǵdyrdyń túrli synaǵyna moıymaǵan ardaqty ákem ózi kórgen qıyndyqtar týraly lám-mım dep jaq ashqan emes. Tirisinde tolǵanyp turyp: «Sender baqyttysyńdar, ata-analaryńdy kórdińder. Men áke-sheshemniń túrin de bilmeımin» dep syr shertkende, janarynda áldebir ókinish pen saǵynyshtyń taby turatyn. Asqar taýymnyń kózin kórgender onyń adal azamat bolǵanyn tamsanyp aıtyp jatatyn.
Ákem maıdan dalasynan aman oralǵanymen, soǵys salǵan júrektegi jaranyń izi qaıtqan emes. Ol jastyq shaǵy men densaýlyǵyn maıdan shebinde qaldyrdy. Janarynan meıirim nury sebezgilep turatyn ákemizdiń meıirban beınesi máńgi jadymyzda qalatyny anyq.
Otan úshin ot keshken Mektep Dúısembıevtiń soǵystaǵy erlikteri eleýsiz qalǵan joq. Kóptegen orden-medal omyraýynda jarqyrady. Ol kisiniń jankeshti erlikteri Reseıdiń «Soǵys batyrlary» saıtynda taıǵa tańba basqandaı anyq saqtalǵan. Asqar taýymyzdyń aty-jóni Taraz qalasynda turǵan «Jeńis» saıabaǵyndaǵy memorıaldyq taqta men Sarysý jerindegi taqtaǵa jazylǵan.
Ardaqty ákem tiri bolǵanda 9 mamyr kúni 100 jasqa tolar edi. Amal neshik, júregine soǵys túsirgen syzat janyn aýyrtpaı qoısyn ba? Biraz jyl buryn fánı jalǵanmen qosh aıtysty. Alaıda onyń beınesi máńgi jadymyzda qalady.
Altynkúl DÚISEMBIEVA,
eńbek ardageri
Jambyl oblysy
