Bul kúni aksııaǵa qatysýshylar qaraǵaıǵa oranyp jatqan kórikti aýyldardyń biri, Taıynty jaqqa jolǵa shyqty. Oblystyq volonterler front-keńsesiniń jetekshisi Aıdos Ádilbekovtiń aıtýynsha, jyl kóleminde mólsheri 29 mln kóshet otyrǵyzylady eken. Jol-jónekeı osy is-sharanyń ótýine uıytqy bolǵan Alekseı Sıbırskıı qatysýshylarǵa jumys barysyn túsindirip ótti. Kóshet egýde, topyraq arasynda aýa qalyp qalmaýyn basa aıtty. Máselen, taıaz shuńqyrǵa tamyr jaıqalǵan kóshetti otyrǵyzý bekershilik eken. Kóshetterdi tasymaldaıtyn bolsa, tamyry aýa óte qoımaıtyndaı pakette bolǵany abzal. Áıtpese, tamyrdaǵy topyraq qurǵap ketedi. Osy sekildi azdy-kópti erejelerdi túsindirgen soń jan-jaqtan kelgen qatysýshylar jasyl jelek egýge kirisken.
– Kóshetter aldymen tuqymbaqtarda tamyr jaıady. Sosyn osyndaı keń ýchaskelerge shyǵaramyz. Kóktemgi ýaqytta 2000 ga, qalǵan 3600 ga kúz aılarynda egiledi, – dedi ShQO tabıǵı resýrstar jáne tabıǵat paıdalanýdy retteý basqarmasy basshysynyń orynbasary Arman Esentaev.
Ekobelsendi Alekseı Sıbırskııdiń sózinshe, ekojúıeni retteý qadamdaryn elimizde de jasaýdy jón kórdi. Alapat orman órti bolǵan Abaı oblysyna barýdy da josparlapty. Degenmen Shyǵys Qazaqstanǵa da at basyn burýdy jón kórdi.
– Baıqasańyzdar, Taıynty tasty jer. Qaraǵaı jaqsy shyǵady. Sondyqtan qaraǵaı kóshetterin otyrǵyzdyq. Onyń kútimin jergilikti orman sharýashylyǵy qyzmetkerleri jaýapkershilikterine alady. Aldaǵy ýaqytta munyń aýqymy keńeıedi. Endigide egiletin kóshetterdiń sany eki esege ulǵaıady, – dedi ekobelsendi A. Sıbırskıı.
Prezıdent bastamasymen qolǵa alynǵan «Taza Qazaqstan» aksııa aıasynda Shyǵys Qazaqstan oblysynda birqatar sharýa atqaryldy. Árkim aınalasyn qoqystan tazartyp, tal ekti. Tabıǵat janashyrlarynyń sózinshe bul ıgi is jalǵasyn taba bermek.
Shyǵys Qazaqstan oblysy,
Ulan aýdany
