Sýretti túsirgen – avtor
Kenjebaı kólin jaǵalap baryp, belden asqandaǵy shalǵyndy jazyqta buryn-sońdy munshalyqty sý bolmaǵan kórinedi. Bıyl aınadaı kól jatyr. Orta tustaǵy qamys-qamystyń arasy shýlaǵan qus. Jaǵasyndaǵy jazırada qańqyldaǵan qazdary qoıdaı jaıylyp júr. Úırekteri tóbeńnen tobymen ushady. Odan bólek láılek, aqqutan sekildi qustar qonǵan. Bir qyzyǵy, jan balasynan úrikpeıdi. Al aýylǵa taıaý bettegi aıdynda jup-jubymen aqqýlar júzip júr. Qanattarymen sýdy sabalaı kelip qonyp jatqandary qanshama? Jergilikti jurt buryndary bir jup aqqý kórsek kórdik, áıtpese ol da joq bolatyn deıdi. Bıyl qustyń kóbeıýin úlkender jaqsylyqqa balap otyr. Ras, qaı qus bolsyn, jumyrtqasyn jaıly ári tynysh jerge salady.
Kóz aldymyzda júzip júrgenderin sanap kórip edik, 12 aqqý eken. Jup-jubymen kól betinde terbelip júr. Álemde aqqýdyń jeti túri bolsa, elimizde onyń eki-aq túri mekendeıdi: sybyrlaq jáne suńqyldaq aqqý. Qustyń syryn biletinderdiń aıtýynsha, Aqsýattyń mańaıyna qonyp jatqandary sybyrlaq aqqýlar. Qandaı bolsa da, kól betin kórikti etip júzedi. Ádemi kórinis. Arǵy jaǵynan asqaryn qar basqan Altaı taýynyń kúngeı jaǵy munartady. Jelke tusymyzda Saýyr-Saıqannyń silemderi kórinedi. Ný qamystyń arasyna juptasyp jumyrtqa salǵan aqqýlar kúzge deıin osy mańnyń kórki bolady.
Shyǵys Qazaqstan oblysy,
Kúrshim aýdany
