Foto: vıdeodan alynǵan kadr
Oqıǵa 2024 jyldyń 12 mamyrynda keshki aqsham namazy ýaqytynda bolǵan. О́zge óńirden Shymkent qalasyna barǵan bir top azamat meshit ımamynyń eskertýine qaramastan birneshe ret jamaǵat namazyn buzǵan. О́zge mázhabta namaz oqyǵan olar jamaǵat pen ımamnyń ótinishine qulaq aspaı, meshit erejesin óreskel buzǵan.
«Namaz kezinde «ámın» duǵasyn qatty daýyspen aıtqan jandardyń áreketine tózbegen meshitke turaqty kelýshi bir azamat olardyń birine qol jumsaǵan. Nátıjesinde ımam jamaǵat namazyn toqtatýǵa májbúr bolǵan. Oqys oqıǵa der kezinde toqtatyldy, polısııa qyzmetkerleri tıisti jumys júrgizip jatyr», delingen QMDB habarlamasynda.
Qazaqstan musylmandary dinı basqarmasy meshitke kelýshi jamaǵatty meshit erejesine baǵynýǵa, sonymen qatar qulshylyq úıinde sabyr saqtaýǵa shaqyrady.
Eske salaıyq, QMDB bekitken «Meshit erejesi» boıynsha Qazaqstan musylmandarynyń aýyzbirshiligi men birtutastyǵyn qamtamasyz etý úshin namaz ben dinı rásimder Ábý Hanıfa mázhaby boıynsha oryndalady.
