Gospıtal Ekinshi dúnıejúzilik soǵys ardagerlerimen qatar, Chernobyl apatynyń zardabyn joıýǵa qatysýshylar men aýǵan soǵysyna qatysýshylarǵa, beıbitshilik ornatý maqsatynda urys qımyldaryna qatysqan eriktilerge, Semeı aýmaǵyndaǵy ıadrolyq synaqtardan zardap shekkenderge de medısınalyq qyzmet kórsetedi. «Munda jylyna úsh myńnan astam adam kelip, em-dom qabyldaıdy», deıdi gospıtaldyń bas dárigeri Dınara Amanbolqyzy Orazalına.
Gospıtalda ekspress-laboratorııa jumys istep tur. Aıtqandaıyn, koronavırýs pandemııasy kezinde gospıtal ujymy bastama kóterip, qatarynan úsh ret ınfeksııalyq aýrýhanaǵa beıimdeldi, dárigerler men kishi medısına qyzmetkerleri ýaqytpen sanaspaı vırýs juqtyrǵandardy emdep, qanshama adamdy ajaldan aman alyp qaldy.
Iаdrolyq apat aımaǵynan kelgen 82 jastaǵy Saǵyntaı Rahmanov Astanadaǵy gospıtalǵa birinshi ret joly túskenin, bolashaqta ár aımaqta osyndaı gospıtal ashylsa degen pikirin bildirdi. «Gospıtal unady, mekeme basshylaryna rızamyn. Barlyq jaǵdaı jasalǵan. Tórt mezgil tamaq beriledi, qajetti dári-dármekten de tapshylyq joq», dep aǵynan jaryldy aqsaqal.
Shyǵys Qazaqstan oblysyndaǵy Tarbaǵataı aýdanyna qarasty Qabanbaı batyr aýylynyń týmasy, bul kúnderi О́skemen qalasynda turyp jatqan Beısenbek Hamzın 1986 jyly Chernobyl apatynyń saldaryn joıýǵa qatysypty. «Apattyń zardaby orasan. Menimen birge bolǵandardyń birazy qatty radıasııa alyp, qaıtys boldy. Sý isherligim bar eken. О́zimdi kúttim, qajetti dári-dármekti ýaqtyly qabyldap otyrdym. Almatydaǵy, Astanadaǵy gospıtaldarda birneshe ret em aldym. Munda bári kóńildegideı», deıdi B. Hamzın.
Shymkent pen Tarazdan kelgen Batyrbek Erbosynov pen Quralbek Asanov ta osyndaı pikirde. Olardyń da gospıtal basshylyǵy men qyzmetkerlerine alǵystan basqa aıtarlary joq.
Ońdasyn ELÝBAI,
ardager jýrnalıst
ASTANA
