Jasóspirimderdiń temeki ónimderine áýestigi qoǵamnyń ózekti máselesine aınalǵaly qashan. Úı men túzde kórgen-túıgen ádetti tez qabyldaıtyn mektep oqýshylarynyń ásirese veıpti tutynýy – búgingi psıhologııalyq-pedagogıkalyq problema. Túıtkilmen kúreste júıeli ári keshendi jumys qajet. Osyǵan oraı Saryarqa aýdany ákimdiginiń, Dene shynyqtyrý jáne sport basqarmasy men Jastar saıasaty máseleleri basqarmasynyń qoldaýymen naýqan uıymdastyryldy.
– Qazir biz teris bir tendensııany anyq baıqap júrmiz. 25 jasqa deıingi jastar arasynda elektrondy temeki keń taralǵan. Aksııa aıasynda biz osy temeki, veıp ónimderin tutynatyn jastarǵa qoldaryndaǵy zııandy zattardy boks qolǵabyna, dopqa, týrnıketke aıyrbastaýdy usynamyz. Osylaısha, elordalyqtardy salamatty ómir saltyna shaqyra otyryp, qalamyzǵa, tabıǵatymyzǵa degen janashyrlyqqa, oń kózqarasqa tartamyz, – dedi Astana qalasy Jastar saıasaty máseleleri basqarmasynyń basshysy Samat Ibraev.
Naýqanǵa elordalyq kıokýshınkaı-kan karateshi Álıhan Asýbaev qatysty. Ol mundaı sharalardyń mańyzdylyǵyn atap ótip, jastardy sportpen aınalysýǵa shaqyrdy.
– Aksııa arqyly biz jastarǵa sportpen shuǵyldanyp, densaýlyqtaryn kútý kerektigin kórsetkimiz keledi. Bizdiń maqsat – jaman ádetterden arylý úshin birigip jumys isteý. Bul kópshilikke motıvasııa bolady dep senemiz, – dedi Á.Asýbaev.
Astana qalalyq máslıhatynyń depýtaty Arslanbek Maǵzumnyń aıtýynsha, janashyrlyqty jalaý etken naýqan elordada jıi ótkizilip turady.
– Bir aı buryn ataqty qazaqstandyq sportshy Vasılıı Tahtaımen birge osyndaı aksııa júrgizgen bolatynbyz. Aldaǵy ýaqytta mundaı is-sharalardy jalǵastyramyz. Igi istiń oń nátıjesin kórip otyrmyz. Aksııa barysynda jınalǵan elektrondy qurylǵylar mamandandyrylǵan zaýytta joıylady, – dedi ol.
