Sýretti túsirgen – Jeńis Ysqabaı
Bul oıyn alańyn shaǵyn eldi meken balalary kópten kútken edi. Turǵyndar da san ret qala ákimdigine hat jazyp, máseleni ortaǵa salǵan. Qazir Erkin aýyldyq okrýgine qaraıtyn 3-bólimshede 150 tútin turady. Mundaǵy turǵyndar búldirshinder úshin zamanaýı talapqa saı jabdyqtalǵan oıyn alańy qajet ekenin aıtyp, tipti oblys ákimdigine de hat jazypty. Osy rette ıgilikti bastamaǵa «Halyq qatysatyn bıýdjet» baǵdarlamasy muryndyq bolǵan. О́ńir ákiminiń baspasóz qyzmetiniń málimetinshe, atalǵan jobaǵa 14 mln teńge qarjy bólingen. Al qurylys jumystaryn «Mir&Er» JShS qolǵa alǵan.
Osy sátti balalarymyz kópten kútti. Qalanyń syrtynda ornalasqandyqtan, balalarymyz oınaıtyn jer tappaı, qalaǵa barýǵa týra keletin. Jańa alańda balalardyń qaýipsizdigi úshin barlyq jaǵdaı jasalǵan. О́zine laıyqty shaǵyn qorshaýy bar. Eń bastysy, jerge rezeńke jabyndysy tóselgen, oıyn quraldary da sapaly. Endi balalarymyz osy alańda alańsyz oınaıdy», deıdi bólimshe turǵyny Svetlana Ajıkenova.
Taldyqorǵan qalasy ákimdiginiń málimetinshe, ýaqyt ótken saıyn atalǵan baǵdarlamaǵa qatysqysy keletin turǵyndardyń sany artyp, olar eń mańyzdy degen jobalardy belsendi usyna bastaǵan. Bul óz kezeginde abattandyrý jumystarynyń qarqyndy júrýine septigin tıgizip jatyr.
«Halyq qatysatyn bıýdjet» jobasy boıynsha ótken jyly 12 joba belgilense, sonyń beseýi iske qosylyp, Yntymaq, Erkin aýyldary, Jastar-1, Kóktal turǵyn aýdanynda ortaq qoldanystaǵy aýlalar abattandyryldy, al qalǵan 7 jobany bıyl aıaqtaımyz. Atap aıtqanda, «Almaly», «Ashybulaq», «Úıtas» saıajaılarynda, 3-bólimshe jáne Batys turǵyn aýdanynda sport jáne balalar alańdaryn ornatyp, Kóktalda trotýar aǵymdaǵy jóndeýden ótpek. Sonyń biri 3-bólimshedegi balalar oıyn alańy qoldanysqa berildi», deıdi qala ákiminiń orynbasary Rústem Bershinbekov.
Onyń aıtýynsha, bıyl «Halyq qatysatyn bıýdjet» baǵdarlamasyna 500 mln teńge qarastyrylyp otyr. Búginde 68 joba túsken, sonyń 22-si – daýys berý satysynda. Kóp uzamaı 22 jobanyń sheshimi shyqqannan soń qalalyq TÚKSh bólimi konkýrsqa berý jumystaryn bastaıdy.
Aıta keteıik, «Halyq qatysatyn bıýdjet» – azamattardyń jergilikti bıýdjet qarajatyn bólýge qatysýy. Turǵyndardyń ózderi abattandyrý ıdeıalaryn usynady, olardy joba deńgeıine deıin pysyqtaıdy, sodan keıin onlaın daýys berý arqyly jeńimpazdardy tańdaıdy.
Joba turǵyndardy kez kelgen jergilikti problemanyń aınalasynda biriktiredi, kórshilerdi talqylaýǵa tartady, aýlany, saıabaqty nemese alańdy qalaı jaqsy jabdyqtaý kerektigin túsinýge múmkindik beredi.
Jetisý oblysy
