Foto: Prezıdent janyndaǵy Memlekettik basqarý akademııasy
Oqytý onlaın jáne oflaın formattardy qamtıdy. Negizgi oflaın sharalardyń biri – BAÁ Mınıstrler kabıneti mınıstriniń básekege qabilettilik jáne tájirıbe almasý jónindegi orynbasary Abdýlla Nasser Lýta, sondaı-aq Mohammed bin Rashid Government mektebi professorlary bastaǵan BAÁ delegasııasynyń sapary. Abdýlla Nasser Lýta bolashaqta aýqymdy jobalardy júzege asyrýǵa daıyn ekenin atap ótti.
«Búginde Qazaqstan men BAÁ arasyndaǵy mádenı, ekonomıkalyq baılanys nyǵaıyp jatyr. Ol ǵana emes, mine, búgin memlekettik qyzmetkerler tájirıbe almasyp jatyr. Bul – biz úshin de úlken mártebe. Aldaǵy ýaqytta aýqymdy jobalardy birlesip júzege asyrýǵa daıynbyz», dedi ol.
Prezıdent janyndaǵy Memlekettik basqarý akademııasynyń rektory Erlan Ábildiń aıtýynsha, memlekettik qyzmetshiler oqý barysynda óz jobalaryn usynady.
«Oqýǵa ortalyq memlekettik organnyń vıse-mınıstrleri, departament basshylary, Akademııanyń ókilderi qatysyp jatyr. Jalpy qatysýshylar sany – 33, olar birneshe topqa bólindi. Sol top boıynsha ózderiniń jobalaryn BAÁ-den kelgen mamandarmen talqylaı otyryp, ortaǵa usynatyn bolady. Birikken Arab Ámirligi – kreatıvti ındýstrııa, tehnologııany damytý boıynsha resýrstardyń azdyǵyna qaramastan órkendeý qarqyny óte joǵary el. Olardyń tájirbıesine súıenip, damyp kele jatqan memleketter sany artyp keledi. Eki el birlese memlekettik qyzmetkerlerdi daıarlaýda birneshe baǵdarlama usynamyz. Onyń ishinde saıası memlekettik qyzmetkerlerge strategııalyq josparlaýdy, strategııalyq oılaýdy úıretý jáne kóshbasshylyq baǵdarlamalary bar», dedi rektor.
Sıfrlyq damý, ınnovasııalar jáne aeroǵarysh ónerkásibi mınıstri Jaslan Mádıev búgin Ulttyq akseleratordyń iske qosylatynyn jarııalady.
«О́zekti problemalyq máselelerdi sheshýdiń 100 kúninde BAÁ-niń jedeldetý tájirıbesin zerdeleı otyryp, atalǵan tetikti Ulttyq jobalyq keńsede iske qosýdy jón kórdik. Memlekettik organdarmen birlesip akselerasııalaý taqyryptary anyqtaldy. Mańyzdy baǵyttardyń biri – Capacity Building (áleýetti arttyrý), onyń sheńberinde QR Prezıdenti janyndaǵy Memlekettik basqarý akademııasymen birlesip, Muhammed ben Rashıd memlekettik basqarý mektebiniń Executive Leadership Program boıynsha Memlekettik organdardyń basshylaryn oqytamyz. Iаǵnı, BAÁ-ne sıfrlyq vıse-mınıstrlerimizdi oqytýǵa jiberemiz, olar jasandy ıntellektini qoldana otyryp, túrli salalardaǵy memlekettik basqarýdyń jańa tásilderi men ádisteri boıynsha oqytylatyn bolady», dep atap ótti mınıstr.
«Kazakhstan Executive Leadership Program 2024» oqytý baǵdarlamasyna qatysýshy Halyqaralyq baǵdarlamalar ortalyǵy AQ Basqarma tóraǵasy Álııa Ospanova jobanyń kóshbasshylar úshin mańyzdylyǵyn atap ótti.
«Birikken Arab Ámirligi 100 kúndikpen jumys isteıdi. Jobanyń ustazdary – Arab Ámirliginiń 50-100 jyldyq strategııalyq qujattaryn jazǵan avtorlar. Olardyń qoıǵan talaptary, kórsetip jatqan tájirıbeleri bizge óte qyzyq. Qazaqstannyń kóshbasshylary osy trenıngke qatysyp, sol ozyq tájirıbeni meńgerýi kerek», dedi qatysýshy.
