Shymkent qalasynda general-leıtenant Sultan Kamaletdınov Keńes Odaǵynyń Batyry Sabyr Rahymov atyndaǵy «Jas ulan» respýblıkalyq mektebinde boldy. Bas shtab bastyǵy pedagogtar men tárbıelenýshilerdi oqý ornynyń alda kele jatqan 40 jyldyǵymen quttyqtap, dańqty jaýyngerlik dástúrlerdi laıyqty jalǵastyrýǵa tilektestigin jetkizdi.
Áskerı bólimderde Qorǵanys mınıstriniń birinshi orynbasary áskerı ınfraqurylym nysandarynyń jaı-kúıin, áskerı bólimderdiń tehnıkalyq jaraqtandyrylýyn jáne oqý-jaýyngerlik prosesti uıymdastyrýdy zerdeledi. Ol sondaı-aq jóndeý sheberhanalaryn aralap kórdi. Bas shtab bastyǵy aldaǵy oqý-jattyǵýlarǵa daıyn bolýy kerek qarý-jaraq pen áskerı tehnıkanyń jaǵdaıyna erekshe nazar aýdardy.
Arys garnızonynda Bas shtab bastyǵy ınjenerlik oq-dárilerdi saqtaý sharttaryn, 44859 áskerı bóliminiń tehnıkalyq aýmaǵyn tazartý jónindegi is-sharalardyń oryndalý barysyn jáne arnaıy jabdyqtalǵan polıgonda jarylys qaýpi bar qaldyqtardy joıý jumystarynyń júrgizilýin tekserdi. Ol oq-dári fragmentterin tazartý jáne kádege jaratý jumystaryn júrgizý kezinde qaýipsizdik sharalaryn qatań saqtaý qajettigin erekshe atap ótti.
Áskerı bólimderde bolǵan kezde general-leıtenant Sultan Kamaletdınov jas sarbazdardy qabyldaýdy uıymdastyrý, kazarmalyq-turǵyn úı qorymen jáne sarbazdar úshin jasalǵan áleýmettik-turmystyq jaǵdaılarmen tanysty. Ol merzimdi qyzmet sarbazdarynyń oqý sapasyna jáne olardyń áskerı eseptik mamandyq alýyna erekshe nazar aýdardy. Kóptegen áskerge shaqyrylýshylar kolledjdi bitirgennen keıin áskerge keledi. Sondyqtan Bas shtab bastyǵy qyzmet barysynda olardyń bilimderin paıdalaný qajettiligin atap ótti.
Jeke qurammen bolǵan kezdesýlerde Qorǵanys mınıstriniń birinshi orynbasary general-leıtenant Sultan Kamaletdınov 2024 oqý jylynyń jazǵy kezeńine Qarýly kúshterdi daıyndaýdyń negizgi is-sharalary men komandalyq quramǵa qoıylatyn talaptarǵa toqtaldy. Ol sondaı-aq áskerlerdiń jaýyngerlik daıyndyq sapasyn arttyrý boıynsha birqatar naqty tapsyrmalar berdi.
