Joba jetekshisi, bıotehnolog Hashem ál-Gaılıdiń aıtýynsha, «BrainBridge» tujyrymdamasynyń árbir qadamy ǵylymı zertteýler negizinde muqııat oılastyrylǵan. «Bizdiń maqsatymyz – jasandy ıntellektiniń múmkindigin barynsha paıdalanyp, medısına ǵylymynyń shekarasyn keńeıtý, sondaı-aq ómirge qaýip tóndiretin jaǵdaılarmen kúresý úshin ınnovasııalyq sheshimderdi usyný. Eger tehnıkalyq-ekonomıkalyq negizdemeler jaqsy nátıje berip, komanda tolyq jınalsa, segiz jyl ishinde alǵashqy operasııany júrgizýdiń jol kartasyn júzege asyramyz. Biz birneshe jyl buryn elestetý múmkin bolmaǵan medısınalyq ádisti jasaýǵa senimdi túrde ýáde beremiz», dedi Hashem ál-Gaılı.
Aıta keteıik, operasııa tolyǵymen jasandy ıntellekt negizinde robottar arqyly júzege asady. Iаǵnı qondyrǵy bir ýaqytta eki denege qatar ota jasaıdy. Degenmen, mundaǵy basty kedergilerdiń biri – transplantasııa kezinde júıke men julynnyń zaqymdanyp qalmaýy. Eger osy jerden qatelesse, basyn aýystyrǵan kez kelgen adamnyń ózi moıynnan tómen sal bolyp qalady.
Qazirgi ýaqytta kompanııa osy kedergilerdi eńserý úshin álemniń túkpir-túkpirinen eń úzdik mamandardy jınap jatyr. Úderis munymen toqtap qalmaıdy, joba jetekshisiniń aıtýynsha, bet transplantasııasyn jasaý da josparlanyp otyr. Alǵashqy tirkelgen bas transplantasııasy 1908 jyly ıtke jasaldy, biraq nátıje bolmaǵan edi. Odan soń Doktor Vladımır Demıhov 1950 jyldary ıtterge bas transplantasııasyn sátti jasady. Biraq otadan keıin janýar jıyrma úsh kún ǵana ómir súrdi. 1970 jyldary ǵalym Robert Ýaıt maımyldarǵa bas transplantasııasyn jasady. Segiz kún boıy janýardyń júregi soǵyp turǵanymen, denesin qozǵalta almady.
Osylaı! Jasandy ıntellektiniń kerneýi kúnnen-kúnge kúsheıip, sát saıyn nebir jańalyqtar ashyp jatyr. Jaı jańalyq emes: tańǵaldyrarlyq ári qorqynyshty...
«BrainBridge» jobasynyń avtory bul júıe emdelmeıtin qaterli isik, Alsgeımer jáne Parkınson sııaqty neırodegeneratıvti aýrýlardan zardap shegetin naýqastarǵa jańa úmit syılaıtynyn aıtady.
