Ol kezeńde kompıýterlik grafıka bolmaǵandyqtan, saıtta tek mátin ǵana turǵan. Eń alǵashynda braýzerler men serverlerdi qalaı ornatý kerektigi týraly aqparat jarııalanyp otyrǵan. Keıin Berners-Lı basqa saıttarǵa da gıpersiltemeler jasaýdy bastady. 1991 jyly veb-server Eýropanyń basqa da aımaqtaryna tarala bastaıdy. 1993 jyldyń qazan aıynda veb-serverler sany álem boıynsha 200-ge jetedi. Bir qyzyǵy, Berners-Lı jasap shyqqan eń alǵashqy saıt áli kúnge deıin jumys isteıdi.
Ushaq
1903 jyly 17 jeltoqsanda alǵashqy ushaqtyń kókke samǵaǵany tarıhta altyn áriptermen jazyldy. Áýede samǵaǵan alǵashqy mehanıkanyń avtorlary – aǵaıyndy Orvıll jáne Ýılber Raıttar.
Olar 1903 jyly alǵashqy ushaqtyń jobasyn aıaqtap, ony is júzinde tekserip kóredi. Tájirıbe orny retinde Soltústik Karolınanyń Kıttı Hoýk degen jeldi aımaǵyn tańdap alady. Orvıll 10,9 km/saǵ. jyldamdyqpen kókte 12 sekýnd (37 metr bıiktikte) samǵaıdy. Kelesi áreketter odan da joǵary nátıjelerdi kórsetedi. Máselen, 1905 jyly kókte jarty saǵat úzdiksiz usha alatyn deńgeıge jetse, 1908 jyly áskerı baǵytta qoldanysqa enedi. Qazirgi tańda ol Vashıngton qalasyndaǵy «Ulttyq áýe jáne ǵarysh mýzeıinde» kórmege qoıylǵan.
Uıaly telefon
Álemdegi alǵashqy uıaly telefondy oılap tapqan Martın Kýper esimdi ónertapqysh.
1973 jyldyń 3 sáýirinde BeLL Laboratories kompanııasy zertteý bóliminiń bastyǵy Djoel Engeldiń jumys kabınetine áldekim qońyraý shalady. Telefon tutqasyn kótergen Djoel basty básekelesi Martınniń daýsyn birden tanydy. «Qaıdan qońyraý shalyp turǵanymdy bilesiń be? Men uıaly telefonnan habarlasyp turmyn», deıdi. Keıin M.Kýper bul oqıǵa týraly bylaı dep eske alady: «Onyń ne dep jaýap bergeni esimde joq, biraq tisteriniń syqyrlaǵanyn estigendeı boldym». Sonymen bul kúngi uıaly telefonnyń atasy – Motorola DynaTac 8000x. Qurylǵy birneshe márte jetildirilip, 1984 jyly satylymǵa shyqty.
