Atap aıtqanda, qumyra, Han kezeńine tıesili qola aına, Rım kezeńinde qoldanysta bolyp, túıreýish rólin atqarǵan fıbýla, syrǵa, maıda bıser men qolǵa taǵýǵa arnalǵan iri monshaqtar tabyldy. Aıaqkıim men beldiktiń toǵasy, qus aýlaý úshin arnaıy jasalynǵan jebe ushy da bar. Altynmen qaptalyp, kógildir aqyq jáne asyltas rýbınmen áshekeılengen polı-hrom stılinde jasalǵan syrǵanyń pishini aı tárizdi. Sarmat-qańly dáýirine tıesili áshekeıdiń astyńǵy jıegi júzimniń dáni sııaqty jasalǵan, segiz qyry kún shýaǵy ispettes.
Zertteýshiler jádigerlerdiń biri – Qańly dáýirine tıesili Han áýletiniń aınasy qaıtys bolǵan adamnyń joǵary dárejeli qyzmette bolǵanyn, ony baı-qýatty adamdar ǵana qoldanǵanyn aıtady. Áıel adamnyń qabirinen tabylǵan qola aınanyń pishini dóńgelek, ortasynda jip ótkizýge arnalǵan tesigi bar, al betki jaǵy 8 arkaly. Buǵan deıin uqsas aınalar Kýshan ımperııasynyń ortalyǵy Aýǵanstan aýmaǵyndaǵy Tıllıa tepe qalashyǵynan jáne ońtústik Oraldaǵy sarmat patshalarynyń jerleý oryndarynan kezdesken eken. Arheologııalyq ekspedısııa jetekshisi, tarıh ǵylymdarynyń doktory, professor Aleksandr Podýshkın tabylǵan jádigerler Qańly memleketi myqty, qýatty ımperııalarmen baılanysta bolǵandyǵyn bildiretinin aıtady. Uly Jibek jolynyń ortalyǵynda ornalasqan Batys pen Shyǵysty jalǵastyrǵan saýda-sattyqty damytyp, úlken qalalardy gúldendirgen Qańly memleketimen keıingi Rım, Vızantııa, Kýshan, Qytaı teń dárejede dıplomatııalyq qarym-qatynasta bolǵan. Qańly memleketiniń quramyna azııalyq sarmat, sıýnný(hýnný), qańly men keıingi saqtar kirgen. Al jerleý ornynyń ýaqyty b.z.d. II ǵasyr men b.z. IV ǵasyr qamtıdy. Jádigerler tarıhı qundylyǵyna qaraı Ulttyq mýzeıge tapsyrylatyn bolady.
Túrkistan oblysy
