О́ndirisiniń órisin keńeıtip otyrǵan túrli seriktestik basshylary jergilikti jurtty jumyspen qamtyp qana qoımaı, aýdan ekonomıkasyn arttyrýǵa aıtarlyqtaı úles qosyp jatyr. Olar jergilikti halyqpen til tabysyp, isin dóńgeletip otyr. Jumysyn shırek ǵasyr buryn bastaǵan, uzaq jyldar boıy toqtaýsyz jumys istep turǵan «Aqtas» JShS áktas jáne shaǵal óndirisin jyl ótken saıyn arttyryp keledi.
Tımýr Baıgeldıev basqaratyn seriktestik qyzmetkerleri tynymsyz eńbek etip, nápaqasyn aıyryp júrgenine de biraz jyldyń júzi boldy. Túrli kezeńdi bastan ótkerse de, seriktestik basshylary jumysty ilki sátke de toqtatqan emes. Munyń ózi tabandylyq pen jankeshtiliktiń úlgisindeı kórinedi.
«Seriktestik jumysyn jandandyrý maqsatynda qoldan kelgenshe jumys atqaryp jatyrmyz. Álbette, ár jumystyń ózine tán qıyndyǵy bolatyny anyq. Áktas pen shaǵal óndirý de túsine bilgenge ońaı sharýa emes. Muny jumysshylar da jaqsy biledi. Biz óz tarapymyzdan olarǵa qoldan kelgenshe qoldaý kórsetip júrmiz. Qazirgi kezde bizdiń ujymda 120 adam eńbek etip jatyr. Olardyń ortasha jalaqysy 180 myń teńgeni quraıdy», deıdi JShS bas dırektorynyń orynbasary Konstantın Afonın seriktestik qyzmetkerleriniń áleýmettik turǵydan qamtylýy týraly oı bólisip.
Derekke sensek, «Aqtas» JShS jylyna 1 mıllıon tonna áktas jáne 200 myń tonna shaǵal óndirýge qaýqarly eken. Árıne, ol úshin seriktestik tolyq qýatynda jumys isteýi kerek. Suranys bolsa, bul mejeni baǵyndyrý qıyn emes.
Jyl bastalǵaly kóp ýaqyt ótken joq. Áıtse de, osy ýaqytqa deıin «Aqtas» JShS 384,1 myń tonna áktas pen 20,9 myń tekshe metr shaǵal óndiripti. Bul kórsetkishti arttyrýǵa áli de múmkindik mol dep bilemiz.
Qordaı aýdanyna qarasty Qarasý aýyldyq okrýginde toqtaýsyz jumys istep jatqan seriktestik ónimin negizinen Qyrǵyz Respýblıkasyndaǵy «Kant sement zaýyty» AQ turaqty túrde tutynady. Shıkizatqa qyzyǵýshylyq tanytatyn basqa da tutynýshylar joq emes.
Jambyl oblysy,
Qordaı aýdany
