Bul kúnderi Marqakól aýdanynyń Boran aýylynda ornalasqan gıdrobekettegi sý deńgeıiniń kórsetkishi boıynsha Qara Ertis ózeniniń deńgeıi 543 santımetrdi quraǵan. Bul qaýipti deńgeıden 18 santımetrge joǵary desedi mamandar.
Qazirgi tańda ShQO ákimdigi jáne TJD jaǵdaıdy baqylaýǵa alyp, shuǵyl sharalar qoldanyp jatyr. Jaǵdaıdy baqylaýda ustaý kerektigi jergilikti jerdegi atqarýshy bılikke, polısııa jáne prokýratýra organdaryna aldyn ala eskertildi.
Aıta keteıik, aýyldyń tómengi tusynda ótken jyly uzyndyǵy 400 metr, bıiktigi 675 santımetr bolatyndaı bóget salynǵan. Ol bógettiń bıiktigi qazir qaýipti deńgeıden 1,5 metr joǵary bolǵandyqtan, áli de 70 santımetrge jýyq aralyq bar.
Qaýiptiń aldyn alý úshin Qara Ertis ózeniniń deńgeıi ár 4 saǵat saıyn ólshenip, táýlik boıy baqylaý uıymdastyryldy. Aýdan ákimi Rústembek Kemeshovtiń aıtýynsha, aýyl mańyndaǵy uzyndyǵy 60 metr bolatyn bógetti kúsheıtý jumystary júrgizilip jatyr.
– Qytaıdan qaıta-qaıta sý kóbeıtip jatyr. О́zenniń jaǵalaýyndaǵy bógenderdi kúsheıtip jatyrmyz. Kesheli beri kanaldardyń boıyn kúsheıttik. Tarbaǵataı, Zaısan, Kúrshim, Samar, Úlken Naryn aýdandarynan tehnıkalar kómekke keldi. 31 tehnıka, 80 adam jumys istep júr. Oblystan 17 tonna dızel otyny jetkizildi. Qaýiptiń aldyn alý úshin úlken jumystar júrgizilip jatyr, – deıdi R.Kemeshov.
Sonymen qatar tótenshe jaǵdaılar qyzmetkerleri de jumyldy. Samar 1 000 qap, Kúrshim 500 qap ınertti materıal jetkizip berdi. Odan bólek, kórshiles Kúrshim aýdany 1 tonna janar-jaǵarmaımen qamtydy. Jergilikti bılik kómekke kelgen azamattardy ornalastyryp, as-sýlaryn ázirlep qoıdy. Toqeteri, judyryqtaı jumylǵan kúsh topan sýdyń aýylǵa kirmeýi úshin kúni-túni jantalasa eńbektenip jatyr.
Tótenshe jaǵdaı bola qalsa, turǵyndardy ýaqytsha ornalastyrý oryndary da ázirlendi. Ol týraly aýyldyqtarǵa eskertildi. Qazirgi tańda jergilikti basshylyq tıisti organdarǵa saǵat saıyn esep berip otyr.
Shyǵys Qazaqstan oblysy,
Marqakól aýdany,
Boran aýyly
