Áleýmettik jobalar jalǵasady

Byltyr áleýmettik jobalar densaýlyq saqtaý, halyqtyń álsiz tobyn qoldaý, bilim berý, óńir­ler­di damytý, mádenıet jáne sport salalary boıynsha 13 aı­­­maqta, sonyń ishinde «Samuryq-Qa­zyna» kompanııalary ornalasqan jerlerde júzege asty. «Samruk-Kazyna Trust» aqparatyna sáıkes 7,2 mlrd teńgege 46 qaıyrymdylyq jobasy iske asyrylyp, jyl basynan beri 16,5 mlrd teńgege 10 joba qarjylandyrylǵan. Elimiz boıynsha 524 myń adam, onyń ishinde 81 myń aýyl turǵyny kómek alyp, 400-ge tarta azamat jumyspen qamtyldy. 10 ońaltý ortalyǵy ashylyp, 11 sport­ ke­she­ni, 26 ámbebap sport-oıyn alań­­dary salyndy. «Salamatty Qazaqstan» densaýlyq poıyzynda 90 myńǵa jýyq aýyl turǵyndaryna 1 mıllıonǵa tarta tegin medısınalyq jáne quqyqtyq kómek kórsetildi. Sonymen qatar múmkindigi shekteýli bala­lar úshin 23 qala men eldi me­ken­de tegin ınklıýzıvti jáne be­ıim­delgen sport seksııalarynyń jelisi jumys istep jatyr. Almaty jáne Shyǵys Qazaqstan oblysynda 400-ge jýyq erekshe balaǵa jazǵy jáne kúzgi ınklıýzıvti lager uıym­dastyryldy. Jańaózendik 227 aýyl balasyna bilim granty berilip, turmysy tómen otbasynan shyqqan 15 myń bala oqý quralymen qamtamasyz etildi. Aqtóbe oblysynda alǵash ret Saǵı Jıenbaev atyndaǵy oblystyq jasóspirimder kitaphanasy jańǵyrtýdan ótip, kreatıv ortalyǵy retinde quryldy. Buǵan deıin iske qosylǵan 37 ońaltý orta­lyǵynan bólek, aldaǵy ýaqytta aýtızmi bar balalarǵa 7 ortalyq, 5 erte aralasý ortalyǵy, Aqmola, Atyraý, Qaraǵandy, Mańǵystaý, Túrkistan oblystarynda jyl sa­­ıyn 50 myń adamnyń sportpen aına­lysýy­­na múmkindik beretin 6 ınklıý­zıvti sport kesheni jumys isteıdi.

Bıyl birinshi toqsanda qorǵa túrli úkimettik emes uıym tarapynan jobalardy júzege asyrýǵa qatysty 100 ótinim kelip túsken. Bul ótken jyldyń osy ýaqytymen salystyrǵanda 30 paıyzǵa kóp. Saraptaýdan ótip, pysyqtalǵan 26 joba Qamqorshylyq keńeske shyǵa­ry­lyp, onyń ishinde quny 1,3 mlrd teńgeni quraıtyn qoǵamdaǵy áleýmettik mańyzdy máselelerdi sheshýge arnalǵan 8 júıeli joba qoldaý tapty. Olardyń qatarynda Almaty qalasynda Daýn sındromy bar balalarǵa, Atyraý oblysy Mııaly aýdanynda múmkindigi shekteýli jan­darǵa arnalǵan ońaltý orta­lyq­ta­ryn salý kózdelgen. Sondaı-aq Pavlodar oblysy­nyń Solnechnyı kentinde deneshynyq­tyrý-saýyq­tyrý keshenine qaıta jóndeý ju­mystary júrgizilip, múm­kindigi shekteýli jandar men jastardyń áleýmettik álsiz toptaryn sıfrlyq daǵdylarǵa oqy­tatyn arna­ıy joba iske qosy­la­dy.

Ońaltý qyzmetin damytýmen birge múmkindigi shekteýli azamattardy jumyspen qamtý máselesine de kóńil bólinip otyr. Bıyl «Samuryq-Qazyna» tobyndaǵy kompanııalarǵa 114 erekshe qajettiligi bar azamat jumysqa turdy. Qordyń QSamruk.kz bos oryndar platformasynda múm­kin­digi shekteýli azamattar úshin ar­naıy bólim ashylyp, suranysqa ıe jumys oryndary usynyla bas­tady. Endi «Samruk-Kazyna Trust» qory arqyly mundaı 180 azamatty AI, No Code ázirleýshi, UI/UX+Web mamany sııaq­ty sıfrlyq mamandyqtarǵa oqytý jobasy bas­talyp, qa­ty­sýshylardyń jumysqa ornalasýy­na kómek kórse­tiledi.

«Qor óńirlerde kóptegen ońaltý orta­lyǵyn ashyp, erekshe qajet­tiligi bar jandardy qoldaýǵa baǵyt­tal­ǵan jobalardy iske asyryp keledi. Biz ońaltýdan ótken erekshe balalardyń bolashaǵyn eskerip, olardyń ári qaraı áleýmettenýine, eńbekpen qamtylýyna nazar aýdarýymyz kerek. Osy baǵytta suranystaǵy kásipterge oqytý men jumysqa ornalastyrý bastamasyn qolǵa alyp otyrmyz», deıdi «Samuryq-Qazyna» qorynyń korporatıvtik basqarý, áleýmettik-eńbek qatynastary jáne eńbekti qorǵaý jónindegi basqarýshy dırektory Ǵıbrat Aýǵanov.

Birneshe jyldan beri balalar­dyń kópten kútetin súıikti jobasyna aınalǵan «Týǵan elge saıa­hat» týrıstik po­ıyzymen bıyl 400 bala qam­tyl­maq. Olar 12 kún ishinde Astana, Býrabaı, Almaty, Taraz, Túr­kistan, Baıqońyr syndy qalalar­dyń tarıhymen tanysyp, ta­nymal oryndardy aralaıdy.

«Bul joly jobaǵa sý tasqynynan zardap shekken óńirlerdegi áleý­met­tik álsiz otbasylardyń jáne qordyń enshiles kásiporyn qyzmet­kerleriniń balalary qatys­ty­ry­la­dy. Jalpy, «Samuryq-Qazyna» kompanııalary tobynyń atynan tabıǵı apat saldarymen kúreske 15 mlrd teńge baǵyt­talady. Sonymen qatar qor kásip­oryndary tarapynan zardap shekken óńirlerdi qoldaýǵa qosymsha sharalar qolǵa alynyp jatyr», dedi «Samruk-Kazyna Trust» qorynyń bas dırektory Alfııa Adıeva.

Áleýmettik salany odan ári damytý men qaıyrymdylyq jobalarymen kópshilikti qamtý maqsatynda qor jyl basynan beri beldi bıznes ókilderimen seriktestikti nyǵaıtyp, iri kásiporyndarmen jáne qoǵamdyq uıymdarmen yntymaqtastyq or­nat­qan. Qazirgi ýaqytta «Shell Qa­zaq­stan», «Ońtústik taý-ken-hımııa kompanııasy», «Qazaqmys» kásip­oryndarymen, sondaı-aq «Qazaqstan halqyna» qorymen ınklıýzııa, sport, halyqtyń áleýmettik osal toptaryn qoldaýǵa baǵyttalǵan birqatar jobany iske asyrý josparlanyp otyr.