Foto: el.kz
Buryn habarlanǵandaı, AÁK-tiń negizgi maqsaty – otbasynyń eńbekke qabiletti múshelerin jumyspen qamtý sharalaryna tartý arqyly otbasyn qıyn jaǵdaıdan shyǵarý, aqshalaı qoldaý kórsetý. Tabysy óńirlik eń tómen kúnkóris deńgeıiniń 70%-ynan aspaıtyn azamattarǵa toqsan saıyn áleýmettik kómek beriledi. Osyndaı otbasylardaǵy 1 jas pen 6 jas aralyǵyndaǵy ár balaǵa 1,5 AEK (5 538 teńge) kóleminde aı saıyn qosymsha tólem qarastyrylǵan. 1 mamyrdaǵy málimetke súıensek, AÁK alýshylar qatarynan mektep jasyna deıingi 104,3 myń balaǵa 1,9 mlrd teńge somasyna qosymsha tólem bólindi.
Sonymen qatar sý tasqynyna baılanysty tótenshe jaǵdaı rejimi jarııalanǵan qalalar men aýdandarda osy jyldyń ekinshi toqsanynda 5 myń otbasyna avtomatty túrde AÁK taǵaıyndaldy.
Bıyl aqpanda ótken Úkimettiń keńeıtilgen otyrysynda Prezıdent halyqty áleýmettik qoldaýdyń qurylymy men tetikterin qaıta qaraýdy, áleýmettik kómektiń tıimdiligin arttyrýdy tapsyrdy. Memleket basshysynyń osy tapsyrmasyn oryndaý maqsatynda Eńbek jáne halyqty áleýmettik qorǵaý mınıstrligi azamattardyń jıyntyq kiristeri men shyǵystaryn aıqyndaýdy eskere otyryp, ataýly áleýmettik kómek kórsetýdiń bıznes-úderisin transformasııalaý tetigin ázirleý boıynsha jumys júrgizip jatyr. Bul, shyn máninde, muqtaj azamattardy anyqtaýǵa, olarǵa memleket tarapynan nysanaly qoldaýdy qamtamasyz etýge múmkindik beredi.
Jyljymaly nemese jyljymaıtyn múlikti satyp alýǵa, oqý aqysy men qosymsha bilim alýǵa, demalys pen oıyn-saýyqqa, saýyqtyrýǵa, jıhaz, turmystyq tehnıka zattaryn satyp alýǵa, kredıtterdi óteýge, taǵy basqa qajet negizgi shyǵystardyń túrlerin kózdeý josparlanyp otyr.
Azamattardyń shyǵystary týraly málimetterdi alýǵa tıisti memlekettik organdar men uıymdardyń – О́nerkásip jáne qurylys, Sıfrlyq damý, Densaýlyq saqtaý, Oqý-aǵartý, Ǵylym jáne joǵary bilim mınıstrlikteriniń, Ulttyq banktiń aqparattyq júıeleriniń ıntegrasııasy qaralady.
