Foto: Ulytaý oblysynyń Polısııa departamenti
Qaıǵyly oqıǵa jeksenbi, 26 mamyr kúni saǵat 14:15 shamasynda respýblıkalyq mańyzy bar Jezqazǵan – Petropavl tasjolynyń Sátbaev qalasynan Jezdi aýylyna deıingi ýchaskede bolǵan.
Sátbaev qalasynan Ulytaý aýdany baǵytynda kele jatqan 2002 jyly týǵan júrgizýshi basqarǵan Mercedes-Benz 190 markaly avtokóligi qarsy jolaqqa shyǵyp ketip, 1978 jyly týǵan júrgizýshi basqarǵan Chevrolet Nexia kóligimen betpe-bet soqtyǵysqan.
Apat saldarynan Chevrolet Nexia kóliginiń júrgizýshisi men onyń úsh jolaýshysy – 1978, 1981 jáne 1971 jyly týǵan áıelder, sondaı-aq Mercedes-Benz 190 kóligindegi 2002 jyly týǵan jolaýshy oqıǵa ornynda kóz jumdy.
Mercedes-Benz 190 kóliginiń júrgizýshisi men 2002 jyly týǵan jolaýshysy Jezqazǵan qalasynyń ortalyq aýrýhanasyna jetkizildi. Olar Ulytaý oblysy Tótenshe jaǵdaılar departamentiniń kishi serjant shenindegi qyzmetkerleri.
Sondaı-aq túrli dene jaraqattarymen Jezqazǵan qalasynyń ortalyq aýrýhanasyna Chevrolet Nexia kóliginiń jolaýshylary – 1999 jyly týǵan áıel men 2023 jyly týǵan qyz bala jetkizildi.
Atalǵan fakti sotqa deıingi tergep-tekserýdiń biryńǵaı tizilimine Qazaqstan Respýblıkasy Qylmystyq kodeksiniń 345-babynyń 4-bóligi «Kólik quraldaryn basqaratyn adamdardyń jol júrisi nemese kólik quraldaryn paıdalaný qaǵıdalaryn buzýy» boıynsha tirkeldi.
