Atalǵan joba 2021-2023 jyldar aralyǵynda júzege asyp, memlekettik qyzmetterdi sıfrlandyrýdaǵy tyń tájirıbelerge arqaý bolǵan zertteýler, konferensııalar, semınarlar jáne oqytý baǵdarlamalary ótken bolatyn. Kavkaz jáne Ortalyq Azııanyń 200-ge jýyq memlekettik qyzmetshileri úshin joba tıimdiligin kórsetti. Qazirgi kezde Astana memlekettik qyzmet haby men BUU Damý baǵdarlamasy, Koreıa Respýblıkasy ishki ister jáne qaýipsizdik mınıstrligi (MOIS), Aqparattyq qoǵam máseleleri boıynsha Ulttyq agenttiginiń (NIA) birlesýimen iske asyp otyrǵan geografııasy keńeıip, qatysýshy elderdiń sany 12-ge jetip otyr. Ortalyq Azııa (Qazaqstan, Qyrǵyzstan, Tájikstan jáne О́zbekstan), Kavkaz (Armenııa, Ázerbaıjan jáne Grýzııa) jáne Azııa-Tynyq muhıty aımaǵyndaǵy (Bangladesh, Kambodja, Laos QDR, Mońǵolııa jáne Fılıppın) elder negizgi kezekte sıfrly transformasııa men sıfrly basqarýdy ilgeriletý úshin memlekettik qyzmetshilerdiń áleýetin nyǵaıtatyn bolady.
Konferensııany BUU Damý baǵdarlamasy Qazaqstandaǵy turaqty ókili Katarjına Vavernıa ashyp, búgingi tańda sıfrlyq tehnologııalar damý quraldarynyń túbegeıli ózgertip jatqanyn aıtty. «Jańa bastama arqyly Koreıanyń sátti tájirıbesin paıdalana otyryp, sıfrlyq transformasııany ilgeriletýdi maqsat etip otyrmyz. Bilimmen, ozyq tájirıbelermen jáne zertteýlermen almasý, semınarlar arqyly qatysýshy elderdiń memlekettik qyzmetkerlerine basqarý júıesiniń sıfrlyq transformasııasyn baǵdarlaýǵa jáne azamattarǵa qyzmetterdi tıimdi jetkizýge múmkindik bere alamyz», dedi BUUDB-nyń Qazaqstandaǵy turaqty ókili.
Koreıa Respýblıkasy Ishki ister jáne qaýipsizdik mınıstrliginiń (MOIS) Sıfrly úkimet pen ınnovasııalar ofısynyń sıfrly qaýipsizdik saıasaty bólimi dırektory Von-Gab Djo 3 jylda jetken jetistikterge toqtalyp, endigi kezekte 12 memlekettiń ýaǵdalastyqqa qol jetkizip otyrǵanyn alǵa tartty. Búginde sıfrly transformasııada aıtarlyqtaı jetistikterge jetken elder tájirıbesimen bólisý asa mańyzdy. Von-Gab Djonyń aıtýynsha, Koreıa úkimeti sıfrly platforma jáne tıimdi basqarýdaǵy tujyrymdary jáne jetistikterimen bólisýge daıyn.
Astana memlekettik qyzmet haby basqarýshy komıtet tóraǵasy Álıhan Báımenovtyń aıtýynsha, sıfrlandyrý – qazirgi tańda memlekettik basqarýdyń mańyzdy quraly bolyp tabylady. «Memlekettik basqarýda sıfrly quraldardy paıdalaný ákimshilik úderisterdi ońtaılandyrýǵa, sheshimder qabyldaýdy jetildirýge, ózekti máselelerde ınnovasııalardy paıdalanýǵa yqpal ete otyryp, memlekettik qyzmet kórsetýde tıimdilikti, ashyqtyqty arttyrýǵa, azamattardyń memlekettik qurylymdarǵa degen senimin arttyrýǵa yqpal etedi. Koreıa úkimetimen birlesken joba buǵan deıin de tıimdiligin kórsetip, búginde qatsýshy elderdiń sany artyp otyr.
«Sıfrly tehnologııalardy, jasandy ıntellektini paıdalaný arqyly memlekettik qyzmettiń tıimdiligin arttyrýda ár el ózdiginen tájirıbe jınaqtap, óz jolymen júrip keledi. Alaıda sıfrly basqarýdy jetildirýde kóshbasshy elderdiń tájrıbesi mańyzdy. Bul baǵytta qatysýshy elder úshin ortaq baǵyt bolmaǵanymen, basqa elderdiń úzdik tájirıbesin zerdeleý arqyly árkim ózine keregin alatyny anyq. Búginde Koreıa, Estonııa, Danııa sııaqty kóshbasshy elder tájirıbesi aımaq úshin ári ózge elderge de mańyzdy sanalady. Osydan úsh jyl buryn Astana memlekettik qyzmet haby men Koreıa arasyndaǵy kelisimge sáıkes Ortalyq Azııanyń tórt memleketimen sıfrly basqarý jobasy iske asqan bolatyn. Osy joba barysynda Koreıa, Sıngapýr, Estonııa sekildi damyǵan sıfrlyq tehnologııalary bar memleketterdiń úlgisi zerdelendi. Nátıjeligine qarap, Kavkaz, Ortalyq Azııadan basqa Tynyq muhıt elderinen taǵy bes memleket qosylyp, jobany taǵy da úsh jylǵa sozý kelisilip otyr. Bul jobanyń aıasynda ozyq elderdiń elektrondy úkimetti damytýdaǵy arhıtektýrasy, tujyrymdamalary, strategııalyq joldary saralanatyn bolady. Ozyq tájirıbeler búginde álem elderin alańdatyp otyrǵan jemqorlyqpen kúreste, sondaı-aq halyqqa qyzmet kórsetýdegi ozyq tájirıbelerge arqa súıeıdi. Osynyń nátıjesinde ár el muqtaj baǵyttar boıynsha pikir almasyp, óz úkimetteri tájirıbesinde paıdalanatyn bolady», deıdi Á.Báımenov.
EYDU sıfrly úkimet ındeksi reıtınginde álemdik kóshbasshy sanalatyn Koreıa Respýblıkasy sarapshylary strategııalar men ınnovasııalardy, sondaı-aq zańnamalyq aspektiler, sıfrly transformasııamen, Kavkaz elderi (Grýzııa, Armenııa, Ázerbaıjan) jáne Ortalyq Azııa (Qazaqstan, Qyrǵyzstan, Tájikstan) elderiniń memlekettik organ ókilderi óz úkimetteriniń sıfrly platformalarynyń jumys negizderimen tanystyrdy.
Konferensııada О́zbekstan jáne Azııa-Tynyq muhıty elderinde (Fılıppın, Laos, Kambodja, Mońǵolııa, Bangladesh) qoldanylatyn tájirıbege basymdyq berilip, memlekettik sıfrly basqarýdy tıimdi damytýdyń basym baǵyttary men birlesken jobalar talqylandy.
ALMATY
