Sýretti túsirgen – Erlan OMAR, «EQ»
Ulttyq testileý ortalyǵynyń habarlaýynsha, tirkelý kezinde talapker testileýdi tapsyratyn qalany ózi tańdaıdy. Úmitkerler ótinishterdi qabyldaý merzimi aıaqtalǵanǵa deıin (8 shildege deıin) bilim baǵdarlamalarynyń toby, tili jáne testileýdi tapsyrý orny boıynsha ótinishke ózgerister engize alady. Talapker testileýdiń ótetin kúni týraly aqparatty jeke kabınetinen 13 shildede kóre alady. Ǵylymı-pedagogıkalyq magıstratýraǵa túsý úshin keshendi testileý elektrondy formatta ótkiziledi jáne úsh bólimnen turady: shet tili boıynsha test, oqýǵa daıyndyǵyn anyqtaýǵa arnalǵan test jáne bilim baǵdarlamalary tobynyń beıini boıynsha test. Barlyǵyna 3 saǵat 55 mınýt beriledi. Shekti upaı – 75.
Al shyǵarmashylyq mamandyqtar boıynsha beıindi magıstratýraǵa úmittilerden qujat qabyldaý 1 maýsym men 8 shilde aralyǵynda joǵary jáne (nemese) joǵary oqý ornynan keıingi bilim berý uıymdarynda júzege asyrylady.
Bıyl beıindi magıstratýraǵa túsý erejelerine ózgeris engizildi. Endi beıindi magıstratýraǵa túsýge nıettiler «Oqýǵa daıyndyǵyn anyqtaýǵa arnalǵan test» bóliminen bosatyldy. Osylaısha, olar tek bilim berý baǵdarlamalary tobynyń beıini boıynsha test tapsyrady. Shekti upaı keminde 30, onyń ishinde árbir beıindi pán boıynsha keminde 7 upaıdy quraıdy. Sondaı-aq basshy laýazymynda keminde 5 jyl ótili bar nemese bilim berý baǵdarlamasynyń beıinine sáıkes mamandyǵy boıynsha keminde 10 jyl eńbek ótili bar tulǵalar beıindi magıstratýraǵa aqyly negizde áńgimelesý nátıjeleri boıynsha qabyldanady. Keshendi testileý nátıjelerimen kelispegen jaǵdaıda talapker testileý aıaqtalǵannan keıin onlaın apellıasııaǵa bere alady.
Magıstratýraǵa túsýshiler 13 myńǵa jýyq bilim berý grantyna úmitker bola alady. Osyǵan deıingi materıalymyzda jazǵanymyzdaı, magıstratýrada oqýǵa bólingen granttar tizimine kelsek, «Injenerlik, óńdeý jáne qurylys» salalary boıynsha mamandyqtarǵa eń kóp grant (3227) bólingen. Odan keıingi rette «Pedagogıka ǵylymdary» baǵyty boıynsha mamandyqtar (3347) qarastyrylǵan. «Jaratylystaný ǵylymdary, matematıka jáne statıstıka» salalaryndaǵy mamandyqtarǵa – 1265, «Aqparattyq-kommýnıkasııalyq tehnologııalar» salalaryndaǵy mamandyqtarǵa 1235 grant bólindi. Al eń az grant bólingeni – «Densaýlyq saqtaý jáne áleýmettik qamtamasyz etý» (225), «Qyzmet kórsetý» (315) salalaryndaǵy mamandyqtar.
