Kollajdy jasaǵan – Qonysbaı ShEJIMBAI, «EQ»
«Ulttyq quryltaıdyń úshinshi otyrysynda jol salý jáne jóndeý boıynsha aýqymdy jumystardy bastaýdy tapsyrdym. Ol keminde 12 myń shaqyrym avtojoldy qamtıdy. Avtokólik joldary – eldiń ekonomıkalyq jáne áleýmettik tynys-tirshiliginiń kúre tamyry. Negizgi qalalarymyz ben aımaqtarymyzdyń arasyn sapaly joldarmen jalǵaý mańyzdy. Taǵy da qaıtalap aıtamyn – sapaly joldarmen. Ashyǵyn aıtsaq, joldardyń sapasy syn kótermeıdi ári bul másele jıi kóteriledi», dedi Qasym-Jomart Toqaev.
Memleket basshysy jol sapasynyń nasharlyǵyna qatysty halyqtyń narazylyǵy oryndy ekenin aıtty.
«Eń bastysy, salany jemqorlyq jaılaǵan. Úkimet pen Sybaılas jemqorlyqqa qarsy is-qımyl agenttigine jol qurylysyndaǵy sybaılas jemqorlyqty joıý jóninde tapsyrma berildi. Memleket bóletin qarjynyń barlyǵy talan-tarajǵa túspeı, tek qana qurylysqa jumsalýy kerek. Bul qazir basym mindet. Máselen, Qyzylorda – Jezqazǵan avtokólik jolyn qaıta jańǵyrtý jumysy birqatar aımaqtyń, onyń ishinde, jańadan qurylǵan Ulytaý oblysynyń damýyna tyń serpin berýi kerek edi. Biraq jóndeý jumystary óte nashar júrgizilgen. Halyq ondaǵan jyldan beri joldyń jaqsarǵanyn kútip otyr», dep atap ótti Prezıdent.
Qasym-Jomart Toqaev elimizdegi avtokólik joldarynyń jaı-kúıine obektıvti monıtorıng júrgizilýge tıis ekenin aıtty.
«Naqty ahýaldy aıqyn kórsetetin tyń tásilderdi oılastyrǵan jón. Jol qurylysy jáne rekonstrýksııa jumystary kezinde barlyq qajetti quzyretke ıe, naryqtaǵy bedeli minsiz, jaýapty otandyq jáne sheteldik kompanııalardyń áleýetin barynsha paıdalaný kerek. Bul iske ashyqtan-ashyq dempıngpen aınalysatyn jalǵan kompanııalardy tartýdyń qajeti joq. Sapaly jol jalpyulttyq mindetke aınalýy kerek. Joldyń sapasy jaqsarmaı, elimizdiń damýy týraly sóz qozǵaý múmkin emes», dep naqtylady Memleket basshysy.
