Qazaqstan UQShU-ǵa tóraǵalyǵy aıasynda qaýipsizdikti qamtamasyz etýdi kózdeıtin halyqaralyq uıymdarmen jáne qurylymdarmen yqpaldastyqty nyǵaıtýǵa nıetti.
«BUU, TMD jáne ShYU-nyń salalyq qurylymdarymen yntymaqtastyqty keńeıtý asa mańyzdy dep sanaımyz. Bıyl qańtar aıynda UQShU Hatshylyǵy men TMD Terrorızmge qarsy kúres ortalyǵy arasyndaǵy yntymaqtastyq týraly memorandýmǵa qol qoıyldy. Biz muny quptaımyz», dedi Prezıdent.
Memleket basshysy spıkerlerge Qazaqstanda júrgizilip jatqan reformalar qoǵamnyń barlyq salasyn, sonyń ishinde saıasat, ekonomıka jáne ıdeologııa baǵyttaryn júıeli túrde jańǵyrtýdy kózdeıtinin aıtty.
Qasym-Jomart Toqaev ekonomıka salasyna toqtala kelip, elimizdiń IJО́ kólemi 265 mıllıard dollarǵa jetkenin málimdedi.
«2023 jyly shetelden 23 mıllıard dollardan astam tikeleı ınvestısııa tartyldy. Elimizdiń halyqaralyq rezervteri 100 mıllıard dollarǵa jýyqtady. Halyqaralyq valıýta qorynyń boljamy boıynsha bıyl Qazaqstannyń jan basyna shaqqandaǵy ishki jalpy ónimi 13 paıyzǵa ósip, shamamen 15 mıllıard dollardy quraýǵa tıis. Jaqynda men kásipkerlik erkindik pen básekelestiktiń damýyn qamtamasyz etý, memlekettiń ekonomıkadaǵy úlesin qysqartý jáne bıznes shyǵyndaryn azaıtý arqyly ekonomıkany yryqtandyrýǵa negiz qalaıtyn Jarlyqqa qol qoıdym. Ekonomıkalyq qyzmet salasyndaǵy qylmystyq quqyqbuzýshylyqtardy dekrımınalızasııalaý arqasynda bıznestiń quqyqtary men zańdy múddelerin qorǵaý isi aıtarlyqtaı kúsheıdi», dedi Prezıdent.
