El arasynda «Ákemteatr» atymen tanymal M.Áýezov atyndaǵy qazaq ulttyq drama teatry kele jatqan 100 jyldyq mereıtoıyna oraı óner saparyna shyqqan.
– Shyǵys Qazaqstanǵa bes kúndik saparmen keldik. 2026 jyly Muhtar Áýezov atyndaǵy Qazaq ulttyq drama teatrynyń júz jyldyǵy. Soǵan oraı ár qalaǵa rýhanı sapar jasap, repertýarymyzdaǵy qoıylymdardy kórermenge usynyp júrmiz. О́skemendikterge «Qozy Kórpesh-Baıan sulý» mahabbat dastany, «Bes boıdaqqa bir toı» syndy qoıylymdar usynylady, – degen Muhtar Áýezov atyndaǵy Qazaq ulttyq drama teatrynyń dırektory Erkin Tileýqululy.
Barlyq qoıylym anshlagpen ótti. Qushaqtaryn gúlge toltyryp, teatrǵa asyqqan elde esep joq edi, ras. Alǵashqy kúni Ǵabıt Músirepovtiń «Qozy Kórpesh–Baıan Sulý» mahabbat dastanymen sahna shymyldyǵy ashyldy. Kórermender óner kerýenin erekshe qoshemetpen qarsy aldy.
– Shyny kerek, «Qozy Kórpesh – Baıan sulý» dastanyn oqyǵanymmen, qoıylymyn birinshi ret kórdim. Akterler sheber oınap shyqty. О́zim sahnada birge júrgendeı kúı keshtim. Osyndaı qoıylymdardy jastarǵa kórsetý kerek, – deıdi kórermen Erkebulan Ámiresh.
Ertesi kópshilik kórermen Dýlat Isabekovtiń «Júz jyldyq mahabbat» dramasyn tamashalady. «Júz jyldyq mahabbat» qoıylymy syrshyl aqyn Maǵjan Jumabaevqa arnap jazylǵany belgili. Spektaklde aqynnyń jastyq shaǵy, albyrt seziminen syr shertiledi. Eki aktili qoıylymdy halyq tebirenip, tolǵanyp otyryp kórdi. Qoıylym aıaqtalyp, zalda jaryq janǵan sátte kóz jastaryn syǵyp alyp jatqan kórermenderdi de kóz shaldy. О́ıtkeni tarıhı qoıylym ǵana emes, Alashtyń aýyr taǵdyryn sezindirdi.
– Áleýmettik jelidegi jylt-jylt etken dúnıege áýes bolyp bara jatyrmyz. Osyndaı salmaqty rýhanı dúnıeni kóbirek kórsek shirkin. Keshegi Maǵjan sengen jastar senimdi aqtaýy úshin kitaphana, mýzeı sııaqty rýhanı ortalyqtarǵa kóp barýymyz kerek shyǵar, – deıdi qoıylymnan oı túıip shyqqan kórermen Ermek Ahmadıev.
Úshinshi kúni Rahymjan Otarbaevtyń «Qytaıdan jetken sálemdeme» atty dramasyn tamashalaýǵa kelgen kórermenniń de qarasy kóp boldy. Shymyldyq túrildi. Kórermen birden almaǵaıyp zamanǵa enip ketkendeı. Jas shamasy alpysty alqymdap qalǵan О́mirbaıdyń alańsyz kóńilin Qytaıdan jetken sálemdeme buzǵan. Sóıtse ol jastyq shaǵynda arǵy bette bala-shaǵasyn tastap, áke-sheshesin alyp, Qazaqstanǵa ótken eken. Qorqaqtyǵy sol, shekara syzyǵyna kelgende, sońynan qýyp jetken áıelin tanymaımyn dep, bergi betke asqan. Qoıylymda muń da, ańsaý da, ókinish te bar. О́kinishtisi, О́mirbaıdyń bir-aq aýyz sózi edi.
Bul kúngi qoıylym kórermendi kúńirentip jiberse, kelesi qoıylym kóńilderin bir serpiltip tastady. Qazaqstannyń halyq ártisi Esmuhan Obaev qoıǵan Israıl Saparbaıdyń «Syǵan serenadasy» mıýzıkli sahnany áýezdi ánmen terbedi. Sońǵy kúni «Ákemteatrdyń» ártisteri kórermendi kúlkige kómip ketti. Bul kúni Tynymbaı Nurmaǵambetovtiń rejısser Orazhan Kenebaev qoıǵan «Bes boıdaqqa bir toı» komedııasy sahnalanǵan. Halyqtyń kúlkige qarq bolǵany sondaı, qoıylym sońynda toqtaýsyz shapalaq soǵyp turyp aldy. Belgili ártis Shynar Asqarova aıtqandaı, sahnada oınap júrgen ártister de kórermen yqylasyn sezdi. Iá, О́skemen – óndiristiń ǵana emes, ónerdiń qudiretin uǵynatyn rýhanı qala.
О́SKEMEN
