Foto: gov.kz
«Oblys boıynsha bizde 410 mektep bar, onyń 106-synda ınternet jyldamdyǵymen máseleler boldy. 20 mamyrdan bastap olar SpaceX kompanııasynyń Starlink tehnologııasy boıynsha keń jolaqty Internetke qosyla bastady. Jumysty shilde aıynyń sońyna deıin aıaqtaýdy josparlap otyrmyz. Jobamen barlyǵy 8,5 myńǵa jýyq bala qamtylady», dedi aqparattandyrý, memlekettik qyzmetter kórsetý jáne muraǵattar basqarmasy basshysynyń orynbasary Meıirjan Jumahanov.
Kókpekti jalpy bilim beretin mektebinde spýtnıktik júıeniń artyqshylyqtary baǵalandy. Bul oqý orny ınternet jyldamdyǵy nebári 8 Mbıt/s deıin tómen bolǵan mektepterdiń biri.
«Starlink bizge 25 mamyrda ornatyldy. Bul óte jaqsy múmkindikter beredi. Muǵalimder men oqýshylar rıza, jańa oqý jylynda jaqsy ınternet bolady. Bizde tórt ınformatıka kabıneti, 100 kompıýter bar: olar ár oqý kabınetinde ornatylǵan. Buryn tómen jyldamdyqqa baılanysty bir mezgilde barlyǵy jumys isteý úshin ınternetke kirý múmkin bolmady. Endi bul másele sheshildi. Muǵalimder kez kelgen sıfrlyq bilim berý resýrstaryn paıdalana alady, kez kelgen ýaqytta kóp kútpesten beıne sabaqtar ótkize alady», dedi Kókpekti OM dırektory Gaýhartas Jaımına.
Jabdyq jıyntyǵyna mektep tóbesinde ornatylǵan spýtnıktik antenna, sonymen qatar birinshi qabatta shtatıv pen marshrýtızator kiredi. Barlyq keńselerde jergilikti jeli ornatyldy.
Starlink tehnologııasy aýyldyq jerlerde talshyqty-optıkalyq baılanys jelileri ornatylǵansha jumys isteıdi. «Qoljetimdi ınternet» ulttyq jobasy boıynsha 2027 jylǵa deıin Qaraǵandy oblysynyń 164 eldi mekenine talshyqty-optıkalyq baılanys jelisin tartý josparlanyp otyr. Bul aýyl mektepterindegi ınternet jyldamdyǵyn barynsha arttyrýǵa múmkindik beredi.
Qyrmyzy JUMAǴALIQYZY,
EUÝ stýdenti
