Basqosýda Astana medısına ýnıversıtetiniń basqarma tóraǵasy-rektor Kamaljan Nadyrov Eýrazııa halyqaralyq mektebiniń eldegi otorınolarıngologııa baǵytyna oń áser etetinin jetkizdi. Ol jas mamandardy osy múmkindikti barynsha tıimdi paıdalanýǵa shaqyrdy.
«Ýnıversıtettiń 60 jyldyq mereıtoıy aıasynda ótip otyrǵan «Plýjnıkov oqýlarynyń» máni bólek. О́ıtkeni, jas otorınolarıngologterdiń aldynda Eýropa, Mysyr, Sıngapýr, Ortalyq Azııa elderi men Reseıdiń belgili ǵalymdary baıandama oqıdy. Tájirıbesin bólisedi. Sheteldik sarapshylardyń kásibı kózqarasy Qazaqstanǵa paıdasyn tıgizedi dep senemiz. Osy arqyly mańyzdy sala damyp, bilikti dárigerlerdiń qatary artady degen oıdamyn», dedi Kamaljan Talǵatuly.
Jıynda elimizdiń dárigerleri sheteldik tanymal ǵalymdar men sarapshylardyń baıandamalaryn tyńdady. Ǵalymdardyń saladaǵy ozyq jetistikterimen tanysyp, bilikti mamandarmen emen-jarqyn pikir alysty. Sonymen birge osy is-shara barysynda Prezıdent Is basqarmasy Medısınalyq ortalyǵy aýrýhanasynyń otolarıngologııalyq klınıkasynda, Astana qalasy ákimdiginiń №1 kópsalaly qalalyq aýrýhanasynyń Otorınolarıngologııa ortalyǵynda lor aǵzalarynyń zamanaýı endoskopııalyq hırýrgııasy jóninde kásibı keńes berilip, sheberlik saǵaty ótti.
