Foto: urjar.kz
Jıynda kól jaǵalaýyn bekitý, elektr jaryǵy, sý, qoqys, káriz júıesine tazartý qondyrǵysyn ornatý, aýyldyń ishki kósheleri, sý kóligi, baılanys júıesi sekildi keıbir tótenshe jaǵdaılardyń aldyn alý sharalary baıandaldy. Ár sala basshylary týrızmdi damytýda kenjelep jatqan máseleler boıynsha esep berip, atqarylǵan aýqymdy jumystardy tanystyrdy. Atap aıtsaq, qajetti ınfraqurylym tartý baǵyty boıynsha búgingi tańda Alakól aýdany ákimdigi tarapynan «Beskól – Aqshı» aýyldarynyń aralyǵyna joǵary kerneýli 110 kVt-tyq, jelilerdi tartý boıynsha jobalyq-smetalyq qujaty ázirlenip, bıýdjettik ótinim joldanǵan. Sonymen qatar, Aqtoǵaı – Kóktuma baǵytynda joǵary kerneýli 220 kVt-tyq elektr jelisin salý jumysynyń joba-smetalyq qujatyn ázirleý jalǵasýda.
Turǵyndardy tolǵandyrǵan Alakól jaǵalaýyndaǵy elektr energııasy máselesin sheshý maqsatynda Aqshı aýylynda ornalasqan qosalqy stansaǵa 2 dana 6300 kVt jáne 6 dana transformator ornatylyp, paıdalanýǵa berilgen. Aqshı aýly men kól jaǵalaýyn elektrmen qamtamasyz etý, elektr energııasynyń ótkizý qabiletin joǵarylatý jumystary jospar boıynsha júrgizilýde.
Búginde kól jaǵalaýyndaǵy 77 demalys orny ortalyqtandyrylǵan aýyzsý júıesine qosylǵan. Taǵy da 23 demalys orny ortalyqtandyrylǵan aýyzsý júıesine qosylýǵa ótinish bildirgen. Demalys oryndary men demalýshylarǵa qolaıly jaǵdaı týǵyzyp, sý júıesimen tolyq ári durys qamtamasyz etý maqsatynda «Alakól sý» jumysty bastap ketken. Al Aqshı aýlyndaǵy kól jaǵalaýyna 17 orynǵa avtoturaq salynyp, arnaıy jol belgileri ornatylǵan.
«Tabıǵaty talaıdy tamsandyrǵan Alakól kóliniń ortasynda Úlken, Kishi Araltóbe, Belqudyq jáne basqa da araldar ornalasqan. Klımaty — kúrt kontınentaldy. Tańerteń kún shýaǵymen kóldiń túsi názik kógildir bolady, al keshke qaraı kók túske aınalady. Eger bul aımaqta jel turyp, daýyl soqsa Alakóldiń sýy lastanyp, qara túske boıalady. Alakól — maltatas jáne qıyrshyq taspen tegistelgen qara jaǵajaıy bar álemdegi jalǵyz kól», deıdi Aqshı aýlynyń turǵyny Asan О́teýov.
Yrǵaıty aýyldyq okrýgine qarasty kól jaǵalaýyndaǵy sanıtarlyq tazalyq jumysyna jaýapty merdiger «ALA COMPANY» JK jáne «Bereke» JK 13 shaqyrym jerge 130 dana qoqys jáshigin ornatsa, merdiger «Ala company» JK qoqys qaldyqtaryn arnaıy orynǵa tasymaldaý jumystaryn júrgizedi. Sondaı-aq Aqshı aýlyndaǵy 3 shaqyrymda ornalasqan qoqys polıgonyn «Qyraýbaeva» JK-ne senimgerlik basqarýǵa jáne aqyly qyzmet kórsetýge berilgen. Olar bul mindettemeni tyńǵylyqty atqarýda.
Bıyl Aqshı men Kóktuma týrıstik aımaǵynda jańadan 8 týrıstik nysan iske qosylyp, demalys ornyn 310-ǵa jetkizý kózdelýde. Oıǵa alǵan jospar tolyq oryndalǵanda Alakólge keletin týrıst sany 1 mln 600 myń adamnan asady.
Sýynyń qupııasy bólek Alakólge asyqqan halyq jeterlik. Tabıǵaty erek, tylsym kúshi ózine tartatyn bul mekende demalýǵa otandastarymyzdan buryn, sheteldikter jıi keletin bolǵan.
Jetisý oblysy
