Sýdaı jańa oqýshylar saraıy qalanyń Prıshahtınsk aýmaǵynan ashyldy. Endi, osy aýmaqta turatyn búldirshinder robottehnıka, VR sáýlet óneri sekildi úıirmelerdiń túr-túrine qatysyp, tanymyn keńeıte alady. Munyń arqasynda balalar qala ortalyǵyna qatynamaı-aq, ózderine jaqyn jerdegi jańa ortalyqqa barady.
Qalanyń Prıshahtınsk aýmaǵynda 12 mektep bar. Munda 8 myńǵa jýyq oqýshy bilim alady. Kún saıyn oqýshylar saraıyna 600-den astam bala men jasóspirim kelmek.
Balalarǵa arnalǵan jańa ǵımarattyń jalpy aýdany 3 myń sharshy metrdi quraıdy. Bolashaq ınjenerler úshin HI-TECH seh, STEM zerthanasy, Intellectum stýdııasy bar. Shyǵarmashylyq daryndylar úshin Art-jáne mýzykalyq stýdııalar quryldy. Sábılerge erte damý kabınetteri jasaqtalǵan. Sondaı-aq jas ekologterge arnalǵan ortalyq ta bar. Tipti telestýdııa, medıa ortalyq jabdyqtalǵan. Konsertter, konkýrstar, jarystar ótkizýge bolatyn úlken akt zalymen qatar, kovorkıng alańy da jumys istep tur.
Munymen qosa, múmkindigi shekteýli balalarǵa da barynsha jaǵdaı qarastyrylǵan. Sensorıka jáne motorıkany damytýǵa arnalǵan kóptegen qurylǵy bar. Mysaly, aýa-kópirshikti kolba kórý men estýdi, taktıldi sezimderdi jetildiredi. Qurǵaq dýsh balanyń erkindigin damytýǵa arnalyp, bosańsýǵa arnalǵan, onyń kómegimen bala jańa tústerdi qyzyqty túrde este saqtaı alady. Inklıýzıvti bilim berý úshin de barlyq jaǵdaı jasalǵan. Jumysqa birden logoped pen psıholog qabyldanǵan.
«Káýsar» oqýshylar saraıynyń ashylýynda sóz alyp, baldyrǵandardy merekesimen quttyqtaǵan oblys ákimi Ermaǵanbet Bólekpaev aldaǵy ýaqytta Maıqudyqtan da osyndaı saraı salamyz dedi.
– Sizderdiń jan-jaqty damýlaryńyz úshin bar jaǵdaıdy jasaýǵa tyrystyq. Munda IT-tehnologııa, ınjenerııa, robottehnıka, VR-sáýlet jáne veb-dızaın, sondaı-aq basqa da kóptegen zamanaýı baǵyt boıynsha úıirmeler jumys isteıdi. Árqaısysyńyzdyń bolashaǵyńyz úshin sapaly bilim alýǵa múmkindik bolǵanyn qalaımyz. Bul jerde sizderge jańa dostar tabýǵa, oqýǵa, izdenýge múmkindik kóp, – dedi aımaq basshysy.
Bıge baratyn Sofııanyń anasy Tatıana Rıhter oqýshylar saraıynyń qyzdaryn taǵy bir úıirmege jazbaqshy.
– Qalanyń iri bóliginiń biri Prıshahtınskide buryn mundaı Oqýshylar saraıy bolǵan joq. Balalar úıirmege qatysý úshin ortalyqqa avtobýspen qatynaıtyn. Halyq tyǵyz ornalasqan aýdanda uzaq ýaqyt kepteliste turatyn. Endi, mine ashyq aýada túrli sharalar ótkizýge bolady. Oqýshylar saraıynyń aınalasy abattandyrylǵan. Fýtbol alańy, trenajerler ornatyldy. Balalar da, ata-analar da jańa saraıdyń ashylýyna bek qýanyshty. Qyzym Sofııa 4,5 jasta. Biz horeografııamen aınalysýdy josparlap otyrmyz jáne taǵy bir shyǵarmashylyq úıirmege jazylǵymyz keledi, – deıdi aýdan turǵyny T.Rıhter.
Osyndaǵy mektepte 10-synyp oqıtyn Ramazan Orazaly birneshe respýblıkalyq jáne halyqaralyq án konkýrstarynyń jeńimpazy. Jas ónerpaz endi oqýshylar saraıyna kelip, shyǵarmashylyǵyn ármen qaraı shyńdamaq nıeti bar.
– Oqýshylar saraıynda balalarǵa barlyq jaǵdaı jasalǵan. Ári qaraı án ónerimen osynda aınalysqym keledi. Bul saraıdan kóptegen talant shyǵaryna senimdimin, – deıdi ónerli jas óren.
Saraıdyń ashylýynda merekelik baǵdarlamalar uıymdastyrylyp, sporttan túrli jarys ótti.
Qaraǵandy oblysy
