«Byltyr 24 myńnan astam stýdent ınjenerlik baǵytta bilim aldy. Qazirgi ýaqytta ınjenerlik bilimge den qoıǵandar kóp. Injenerlerdi daıarlaýda da birqatar jetistikke jettik. Qazirgi ýaqytta atalǵan baǵytta 11 oqý-ádistemelik bar. Jalpy, 8 myńnyń ústinde bilim baǵdarlamasy bolsa, onyń myń jarymy tehnıkalyq baǵytta. Alaıda bul zaman talabyna saı ma? Sony júıelep alýymyz kerek», – deıdi Ǵylym jáne joǵary bilim mınıstrliginde Joǵary jáne joǵary oqý ornynan keıingi komıtet tóraǵasynyń orynbasary Gúljan Jarasova.
Otyrysta aıtylǵandaı, tehnıkalyq oqý oryndarynyń kóbi kásiporyndarmen qarym-qatynasty nyǵaıta túsýleri qajet. О́skemen óndiristik qala bolǵandyqtan, D.Serikbaev atyndaǵy ShQTÝ stýdentteri praktıkany da óndiris oshaqtarynda ótedi. Qarym-qatynas tyǵyz. Degenmen zamanǵa qaraı ınjenerlik-tehnıkalyq baǵyttaǵy mamandardy daıarlaýdyń jańa tujyrymdamasy ázirlenip, talqyǵa túsip jatyr.
Jıynda jańa tehnologııany meńgerip, el ekonomıkasyn ilgeriletýdiń jańa ádisin qalyptastyrýymyz kerek. Ol úshin tehnıkalyq, ınjenerlik kadrlardy jeteleýimiz kerek. Atalǵan tujyrymdamaǵa qatysýshylardyń biri Q.Sátbaev atyndaǵy Qazaq ulttyq tehnıkalyq zertteý ýnıversıteti men D.Serikbaev atyndaǵy ShQTÝ ekendigi de aıtyldy. Alaıda qazir ınjenerlik baǵytta kadr tapshylyǵy bar. Ony sheshý úshin «Mamandyǵym – bolashaǵym» jobasy júzege asyp jatyr.
ShQTÝ rektory Sáýle Rahmetýllınanyń sózinshe, bilikti maman daıarlaý úshin oqytýshylardyń deńgeıi halyqaralyq dárejedegi tájirıbemen sáıkesýi kerek. Bile bilsek, D.Serikbaev atyndaǵy ShQTÝ – CDIO júıesiniń qozǵalysyna Ortalyq Azııa kóleminde tuńǵysh engen ýnıversıtet.
«Kóshpeli otyrysqa qatysýshylar Shyǵys Qazaqstanda bas qosty. Kelesi qaı qalada ótetini belgisiz. Dese de, tehnıkalyq ýnıversıtetter bazasyna baryp, óz tájirıbemizben bólisýge daıynbyz. 2022 jyly Sıngapýrde ótken forýmnan kóptegen maǵlumat alyp qaıttyq. Sonda biz óz ýnıversıtetimizdi tanystyryp, CDIO júıesin oqý baǵdarlamasyna qalaı engizip jatqanymyzdy kórsettik. Bul bastamanyń negizgi maqsaty – stýdentter oqýyn aıaqtap, óndiriske kelgende birden jumysqa kirisýin baqylaýda ustaý edi», – dedi Sáýle Jádigerqyzy.
Iá, D.Serikbaev atyndaǵy ShQTÝ – Ortalyq Azııadaǵy negizgi ýnıversıtetterdiń biri. Munda oqyǵan stýdentter de óndiris oshaqtarynda qat mamandyqty alyp shyǵyp jatyr. Eń bastysy, oqýdy támamdaǵan túlekterdiń júz paıyzǵa jýyǵy jumysqa ornalasady.
«Jalpy, oqý ornynyń tarıhy tereń, ózindik strategııasy men saıasaty bar. Injenerlik bilim jolynda úlken top eńbek etti. Endi osy tájirıbeni basqa bilim ordalarynda qolǵa alǵandy jón dep bilemin», dedi bilim ordasynyń rektory.
Ǵylym jáne joǵary bilim mınıstrliginde Joǵary jáne joǵary oqý ornynan keıingi komıtet tóraǵasynyń orynbasary Gúljan Jarasova qazir tehnıkalyq baǵyttaǵy mamandyqtarǵa qansha maman tapshy ekenin zertteý kerektigin aıtty. Magıstratýra men doktorantýrada bilim alatyndarǵa stıpendııa tóleý máselesi de qarastyrylyp jatqanyn sóz etti.
Sondaı-aq Prezıdent Qasym-Jomart Toqaevtyń ǵylymdardyń aldynda qoıǵan tapsyrmasy tóńireginde de sóz qozǵaldy. Atap aıtsaq, tehnogendik jáne tabıǵı apattardy joıatyn kadrlardy daıarlaý qajet. Jasyl energetıkany damytý, sý qoryn saqtaý, oqý oryndaryn jetildirý, ındýstrııaldyń phd baǵyttaryn jandandyrý kún tártibinen túspeýge tıis.
Jıynda seısmologııa taqyrybynda áńgime órbip, túrli tabıǵı apatty joıý óte mańyzdy máselelerdiń biri ekeni qaıtalandy. Elimizdiń shyǵysy, ońtústik shyǵysy – seısmıkalyq qaýipti aımaq. Al Ortalyq Qazaqstan tehnogendik jer silkinisine beıim. Bul salada zertteý júrgizip otyrǵan seısmolog ǵalymdar Pekın ǵalymdarymen tikeleı baılanysta. Gıdrologııa jáne ınjener geologııa mamandyǵy da keń óris alyp keledi. Bul mamandyq eń alǵash 1932 jyldan bastap Semeıde oqytyla bastaǵan. Endigi kezekte joǵaryda atalǵan ınjenerııa salasy jan-jaqty damı túsedi.
Shyǵys Qazaqstan oblysy
