Eki kúnge sozylǵan semınarda ınnovasııalyq oqý baǵdarlamalaryn ázirleý men saraptaý máseleleri, ERG-men bilim alý: triple helix model – jumys berýshiler men bilim mekemeleriniń ózara baılanysynyń jańa formattary, sonymen qatar bilim baǵdarlamalaryn ázirleýde praktıkalyq sessııalar men pánder sıpattamalary qarastyryldy.
«Biz dástúrli mamandyqtar tehnologııa, sıfrlyq saýattylyq pen kreatıvtilikti talap etetin jańa mamandyqtarmen almasqan kezeńniń tabaldyryǵyn attaǵaly turmyz. Bul úrdis mamandyqtyń mańyzyn ózgertip qana qoımaı, bilim berý ádisterin ózgertýdi de talap etedi. Jasandy ıntellekt pen robottandyrý dástúrli úrdisterdi oryndaý jolyn ózgertip, róli men qyzmetin qaıta qaraýǵa túrtki bolady. Shablondy emes ádister men tásilderdi paıdalaný, komandada konstrýktıvti áreket etý daǵdylary men uqypty óndiris qaǵıdattaryn júzege asyrý arqyly máselelerdi anyqtap, sheshý negizgi quzyrettilikterge aınaldy», deıdi S.Toraıǵyrov ýnıversıtetiniń rektory Erkin Sadyqov.
Semınarǵa elimizdegi joǵary oqý oryndarynyń prorektorlary, oqý-ádistemelik basqarmalardyń basshylary, oqý hatshylary men oqý-ádistemelik basqarmalarynyń músheleri, bilim baǵdarlamasynyń ázirleýshileri qatysty.
Sondaı-aq trenıng aıasynda Joǵary bilim ulttyq ortalyǵy, Eńbek jáne halyqty áleýmettik qorǵaý Eńbek mınıstrliginiń ortalyǵy, «Samsung Electronics» kompanııasy, «MATRIZ» qaýymdastyǵy, ERG toptary, «IncomCompany» JShS ókilderi sóz alyp, túrli saladaǵy úderister týraly aıtyp, tájirıbelerimen bólisti. Jańa mamandyqtardy ıgerýge kómektesetin tabysty ınnovasııalyq bilim baǵdarlamasy boıynsha mysaldar tanystyrdy.
Aıta keteıik, S.Toraıǵyrov ýnıversıteti jańa mamandyqtar atlasy baǵdarlamasyn júzege asyrady. Joǵary oqý ornynda eńbek naryǵynda suranysqa ıe 12 ınnovasııalyq bilim baǵdarlamasy ázirlengen. 2022 jyly, S.Toraıǵyrov ýnıversıteti elimizdegi alǵashqy eki ınnovasııalyq bilim baǵdarlamasyn iske qosqan birinshi joǵary oqý orny atandy.
