Jalpy bizde ulttyq ekonomıkany damytýda ózindik úlesi bar kreatıvti ındýstrııanyń sáýlet, sán, óner, mýzyka, dızaın, kıno, IT-tehnologııalar men halyq qolóneri sekildi shyǵarmashylyq baǵyttary jumys isteıdi. Buǵan deıin atalǵan ekonomıkanyń naqty anyqtamasy men tizbesi bolmaǵan. Tek Úkimettiń ótken jylǵy 6 maýsymdaǵy №448 qaýlysymen osy qyzmet túrleriniń tizbesi bekitildi. Oǵan 43 ekonomıkalyq qyzmettiń jalpy jiktemesi engizilip, 32 myń kásipkerlik sýbektisinde 300 myńǵa tarta adam jumys isteıdi. Negizgi kapıtalǵa salynǵan ınvestısııa 35 mlrd teńgege jýyq bolsa, el ekonomıkasyna qosqan úlesi – shamamen 2,7%.
Jalpy keler jylǵa deıingi ulttyq damý josparynda jańa jumys oryndaryn quryp, kreatıvti de bilimdi jastardy jumyspen qamtý mindetteri kózdelgen edi.
Oǵan qosa, Ulttyq ekonomıka mınıstrligi kreatıvti ındýstrııany damytýda IJО́-ge salymdy 3%-ǵa, jumyspen qamtylǵandardyń úlesin 4%-ǵa deıin ulǵaıtyp, shaǵyn jáne orta bıznes sanyn 80 myń birlikke deıin jetkizýge, sonymen qatar ónim eksportyn 200 mln dollarǵa arttyrýǵa múmkindik berýge tıis degen boljam jasaıdy. Qalaı desek te aldymyzdaǵy jyly kreatıvti ındýstrııanyń Qazaqstan ekonomıkasyna qosqan úlesi 5%-ǵa jetýi kerek.
Sonyń bir dáleli - taıaýda Sankt-Peterbýrg qalasynda ótken halyqaralyq ekonomıkalyq forýmynda Shyǵarmashylyq bastamalar men mádenı mura qoǵamdyq qory óz jumysyn tanystyrǵany bar. Ondaǵy jalpy maqsat – shyǵarmashylyq kásipkerlik salasynda bilim berý, konsaltıngtik qyzmetterdi kórsetý, halyqaralyq qyzmetterdi ilgerletý men osy saladaǵy ǵylymı-zertteý jáne taldaý qyzmetterin jarııalaý arqyly Qazaqstan men EAEO elderi arasynda kreatıvti ekonomıka jáne kreatıvti ındýstrııany damytýǵa jaýapty uıymdarmen qatarlasa tıimdi yntymaqtastyq qarym-qatynas ornatýdy kózdep otyr. Bul qor «Sankt-Peterbýrg halyqaralyq ekonomıkalyq forýmy–24» aıasynda Reseı shyǵarmashylyq ındýstrııa federasııasymen ekonomıka salasyndaǵy halyqaralyq yntymaqtastyq týraly kelisimge alǵash ret qol qoıdy. Keleshekte eki tarap ózara tájirıbe almasýdy, kásipkerler arasynda shyǵarmashylyq jáne iskerlik baılanysty odan ári nyǵaıtýdy josparlaıdy.
«Mundaı seriktestik eki el arasynda bıznesti tıimdi damytyp qana qoımaı, halyqaralyq naryqta óz pozısııasyn aıqyndaýǵa múmkindik alady. Atalǵan salany damytý boıynsha usynystar, strategııalar men baǵdarlamalardy ázirleý yntymaqtastyqtyń mańyzdy baǵyty bolmaq», deıdi Shyǵarmashylyq bastamalar men mádenı mura qoǵamdyq qorynyń negizin qalaýshy, sáýletshi Dına Abdrahmet.
Sonymen qatar elaralyq bilim berý men aqparattyq-túsindirý bastamalaryn damytý da oıda bar ekendigin jetkizdi.
Reseı kreatıvti ındýstrııa federasııasynyń bas dırektory Igor Namakonov qazir ártúrli baǵalaýlar boıynsha, 2030 jylǵa qaraı IJО́-niń 10%-dan astamy álemdik kreatıvti salalarǵa tıesili bolatyndyǵyn, al shyǵarmashylyq óndiristiń ózi Batystan BRIKS-ke (Brazılııa, Reseı, Úndistan, Qytaı jáne Ońtústik Afrıka Respýblıkasy t.b.) múshe elderine kóbirek aýysyp jatqandyǵyn, 10 BRIKS elderiniń 8-i shyǵarmashylyq ındýstrııany damytý strategııasyn álemdik arenadaǵy pozısııany nyǵaıtýda halyqaralyq yntymaqtastyqty damytý tarmaqtaryn engizgendigin atap ótti.
Jalpy forým Qazaqstan men Reseı arasyndaǵy kreatıvti ındýstrııany qoldaýda halyqaralyq yntymaqtastyqtyń alǵashqy ári tabysty tájirıbeniń negizin qalaǵandaı. Sonymen birge bizdiń qor Strategııalyq bastamalar agenttigimen kelisimge otyryp, eki eldiń kreatıvti ekonomıkasyn zertteý boıynsha aqparattyq almasý, kreatıvti ındýstrııalardy damytý, strategııalardy ázirleý kezinde keńesý, jobalar men baǵdarlamalardy birlese júzege asyratyn boldy. Atalǵan agenttik qazirdiń ózinde otandyq áriptesterimen shyǵarmashylyq ındýstrııany damytýdyń óńirlik standartyn engizý tájirıbesimen bólisýge daıyn. Qazirdiń ózinde SBA kreatıvti ekonomıkalyq damytý ortalyǵy bizdegi «Prodıýserler klýby» men «Shyǵarmashylyq keńistikter jelisi» sekildi eki aýqymdy jobaǵa qatysýǵa nıet bildirip otyrǵan jaıy bar.
«Álemdik naryqta básekege qabiletti jańa elaralyq jáne pánaralyq shyǵarmashylyq jobalardy tıimdi paıdalanýda, shyǵarmashylyq ekonomıka salasyndaǵy halyqaralyq yntymaqtastyq strategııasy qalyptasty. О́ıtkeni kreatıvti ekonomıka – bul jahandyq ekonomıka. Qazaqstan SBA kreatıvti ekonomıkalyq damytý ortalyǵynyń jumysynda kelisimge qol qoıǵan birinshi el», deıdi SBA kreatıvti ekonomıkany damytý ortalyǵynyń dırektory Ekaterına Cherkes-zade.
Sonymen «Shyǵarmashylyq bastamalar men mádenı mura» qoǵamdyq qory kreatıvti ındýstrııa salasyndaǵy eki iri halyqaralyq oıynshymen mańyzdy kelisim jasady.
«Bul Qazaqstan men Reseı arasyndaǵy kreatıvti ındýstrııany qoldaýdaǵy tabysty halyqaralyq yntymaqtastyqtyń bastamasy. Seriktestikter bizdiń kreatıvti mamandarymyzdyń sheteldegi ustanymyn nyǵaıtýǵa jáne jergilikti óndiristerdi jańa ıdeıalarmen keńeıtýge kómektesedi. Bul yntymaqtastyq jahandyq ıntegrasııa el arasyndaǵy jasampaz ekonomıkanyń ósýi men damýyna qalaı yqpal etetindigin kórsetedi», deıdi qordyń negizin qalaýshy Dına Abdrahmet.
Iá, kreatıvti ındýstrııa el úshin mańyzdy ekonomıkalyq artyqshylyqtyń biri ekeni ras. Álemde bul naǵyz ınklıýzıvti ekonomıkanyń damý kózi bolyp tur. Azamattardyń shyǵarmashylyq áleýeti men zııatkerlik kapıtalyna negizdelgen «shyǵarmashylyq óndiris» bolashaqta ekonomıkanyń eń mańyzdy salasyna aınalýy ábden múmkin.
