Baldyrǵandardyń alǵashqy saparyna tań bozynan sát sapar tileýge kelgen oblys ákiminiń orynbasary Marlen Kólbaev pen oblystyq bilim basqarmasynyń basshysy Marat Súleımenov aqjarma tilegin arnady. «Sálem, jaz – 2024» atty jazǵy demalys maýsymynyń bastalýymen quttyqtap, estelik sýretke tústi.
«Árbir bala otbasynyń jylýyn ǵana emes, qorshaǵan ortanyń da meıirimin tolyq sezine bilýi qajet. Barlyq bala baqytty bolýǵa laıyqty. Qazir óńirde balalardyń jazǵy demalysyn jaqsy ótkizý úshin túrli is-shara qolǵa alynyp jatyr. Ata-analar da qalys qalmaı, ustazdarmen birlese jumys isteý kerek. Bala degen baqyttyń búldirgeni emes pe, olar aman bolsa eldiń bolashaǵy da jarqyn bolady», deıdi M.Kólbaev.
Jalpy, oblysta balalarǵa arnalǵan 14 saýyqtyrý lageri jumys isteıdi. Onyń ishinde 12-si qala syrtyndaǵy jazǵy saýyqtyrý ortalyqtary bolsa, qalǵany – múgedektigi bar balalarǵa arnalǵan jazǵy saýyqtyrý ortalyǵy men daryndy balalarǵa arnalǵan lager. Búginde oblysta 1-10 synyptaǵy 121 166 oqýshynyń 102 630-y jazǵy demalyspen qamtylǵan.
«Oqýshylar 4 baǵyt boıynsha saparǵa shyǵady. Atap aıtqanda, balalar Kerbulaq aýdanynda aǵartýshy ǵalym Shoqan Ýálıhanovtyń «Altynemel» memorıaldy murajaıyn, Úshtóbe qalasynda byltyr ashylǵan Qaratal ólketaný murajaıyn, Aqsý aýdanyndaǵy Aqyn Sara murajaıyn tamashalap, tabıǵat keremeti Tamshybulaqpen tanysady. Sondaı-aq Taldyqorǵan qalasyndaǵy Muhametjan Tynyshbaev atyndaǵy tarıhı-ólketaný murajaıyna, Ilııas Jansúgirovtiń ádebı murajaıyna ekskýrsııa jasaıdy. Mundaı tanymdyq ekskýrsııalar jaz boıy jalǵasyp, oǵan oblystyń barlyq aýdan-qalasyndaǵy oqýshylar qatysatyn bolady», dedi M.Súleımenov.
Mektep janyndaǵy lagerlerde demalatyn balalar týrıstik saıahatpen, eńbekpen, shyǵarmashylyqpen, ıntellektýaldyq shyńdaýmen aınalysady. Mektep aýlasyna kıiz úıler qurylyp, ulttyq qundylyqtarǵa negizdelgen is-sharalar uıymdastyrylady. Bul rette kógaldandyrý jáne ata-analarymen jumysqa 46 507 bala qatyssa, ekskýrsııa 19 820 bala shyǵady. Al úıirmeler men aýla klýbyna – 32 700 oqýshy barsa, «Jas ulan», «Jas qyran», mektep janyndaǵy tildik mektepter men debattyq qozǵalysqa 18 998 bala qatysady.
Aıta keteıik, «Qazaqstan halqyna» qoǵamdyq qory esebinen balalar demalysyna 159 mln teńge qarastyrylǵan. Bul múmkindikti 1 113 bala paıdalanbaq. Odan bólek, 242 bala Kókshetaý, Qonaev, Almaty qalalaryndaǵy jazǵy saýyqtyrý ortalyqtarynda bolady. Búginde qala syrtyndaǵy lagerlerdiń 7-eýi sanıtarlyq-epıdemıologııalyq baqylaý departamentine qorytyndy alýǵa ótinim berip, rásimdelý ústinde.
«5 lager zerthanalyq zertteýleriniń qorytyndysyn alǵanǵa tapsyrys berdi. «Jalyn» saýyqtyrý lageriniń qujaty halyqqa qyzmet kórsetý ortalyǵyna tirkeýge berildi. «Shaǵala» saýyqtyrý lagerinde aǵymdaǵy jóndeý jumystary júrgizilýde. Ashylý ýaqyty 17 maýsymǵa belgilenip otyr. Aldaǵy ýaqytta 2 memlekettik «Tamshybulaq», «Qarlyǵash» jáne 3 jekemenshik «Bastaý», «Jetisý», «Qarlyǵash» lagerleri ashylady dep josparlap otyrmyz», deıdi oblystyq bilim basqarmasynyń orynbasary Gúlmıra Ahmetova.
Oblysta memlekettik satyp alý portaly arqyly 3 771 balaǵa joldama utyp alǵan, onyń 1 856-y – Taldyqorǵan qalasynyń balalary. Balalardyń 2 847-i oblys aýmaǵyndaǵy lagerde, qalǵany Almaty oblysynyń aýmaǵynda ornalasqan lagerde demalady.
Jetisý oblysy
