Kollajdy jasaǵan – Záýresh SMAǴUL ,«EQ»
Bizde ulttyq ekonomıkany damytýda ózindik úlesi bar kreatıvti ındýstrııanyń sáýlet, sán, óner, mýzyka, dızaın, kıno, IT-tehnologııa men halyq qolóneri sekildi shyǵarmashylyq baǵyttary jumys isteıdi. Buǵan deıin atalǵan ekonomıkanyń naqty anyqtamasy men tizbesi bolmaǵan. Tek Úkimettiń ótken jylǵy 6 maýsymdaǵy №448 qaýlysymen osy qyzmet túrleriniń tizbesi bekitildi. Oǵan 43 ekonomıkalyq qyzmettiń jalpy jiktemesi engizildi. Qazir 32 myń kásipkerlik sýbektisinde 300 myńǵa tarta adam jumys isteıdi. Negizgi kapıtalǵa salynǵan ınvestısııa 35 mlrd teńgege jýyq bolsa, el ekonomıkasyna qosqan úlesi – shamamen 2,7 paıyz.
Jalpy, ulttyq damý josparynda jańa jumys oryndaryn quryp, kreatıvti hám bilimdi jastardy jumyspen qamtý mindetteri kózdelgen. Oǵan qosa, Ulttyq ekonomıka mınıstrligi kreatıvti ındýstrııany damytýda IJО́-ge salymdy 3 paıyzǵa, jumyspen qamtylǵandardyń úlesin 4 paıyzǵa deıin ulǵaıtyp, shaǵyn jáne orta bıznes sanyn 80 myń birlikke deıin jetkizýge, sonymen qatar ónim eksportyn 200 mln dollarǵa arttyrýǵa múmkindik berýge tıis degen boljam jasaıdy. Qalaı desek te aldaǵy jyly kreatıvti ındýstrııanyń el ekonomıkasyna qosqan úlesi 5 paıyzǵa jetýi kerek.
Taıaýda Sankt-Peterbýrg qalasynda ótken halyqaralyq ekonomıkalyq forýmda «Shyǵarmashylyq bastamalar men mádenı mura qoǵamdyq qory» óz jumysyn tanystyrdy. Ondaǵy jalpy maqsat – shyǵarmashylyq kásipkerlik salasynda bilim berý, konsaltıngtik qyzmet kórsetý, halyqaralyq qyzmetterdi ilgeriletý men osy saladaǵy ǵylymı-zertteý jáne taldaý qyzmetterin jarııalaý arqyly Qazaqstan men Eýrazııalyq ekonomıkalyq odaq elderi (EAEO) arasynda kreatıvti ekonomıka jáne kreatıvti ındýstrııany damytýǵa jaýapty uıymdarmen qatarlasa tıimdi yntymaqtastyq qarym-qatynas ornatý. Bul qor halyqaralyq ekonomıkalyq forým aıasynda Reseı shyǵarmashylyq ındýstrııa federasııasymen ekonomıka salasyndaǵy halyqaralyq yntymaqtastyq týraly kelisimge alǵash ret qol qoıdy. Keleshekte eki tarap ózara tájirıbe almasýdy, kásipkerler arasynda shyǵarmashylyq jáne iskerlik baılanysty odan ári nyǵaıtýdy josparlaıdy.
«Mundaı seriktestik eki el arasynda bıznesti tıimdi damytyp qana qoımaı, halyqaralyq naryqta óz pozısııasyn aıqyndaýǵa múmkindik alady. Atalǵan salany damytý boıynsha usynystar, strategııalar men baǵdarlamalardy ázirleý yntymaqtastyqtyń mańyzdy baǵyty bolmaq», deıdi qor negizin qalaýshy, sáýletshi Dına Abdrahmet.
Sonymen qatar elaralyq bilim berý men aqparattyq-túsindirý bastamalaryn damytý da oıda bar ekendigin jetkizdi.
Reseı kreatıvti ındýstrııa federasııasynyń bas dırektory Igor Namakonov qazir ártúrli baǵalaý boıynsha, 2030 jylǵa qaraı IJО́-niń 10 paıyzdan astamy álemdik kreatıvti salalarǵa tıesili bolatyndyǵyn, al shyǵarmashylyq óndiristiń ózi Batystan BRIKS-ke (Brazılııa, Reseı, Úndistan, Qytaı jáne Ońtústik Afrıka Respýblıkasy, t.b.) múshe elderge kóbirek aýysyp jatqanyn atap ótti.
Forým Qazaqstan men Reseı arasyndaǵy kreatıvti ındýstrııany qoldaýda halyqaralyq yntymaqtastyqtyń alǵashqy ári tabysty tájirıbesiniń negizin qalaǵandaı. Sonymen birge, qor Strategııalyq bastamalar agenttigimen kelisimge otyryp, eki eldiń kreatıvti ekonomıkasyn zertteý boıynsha aqparattyq almasý, kreatıvti ındýstrııalardy damytý, strategııalardy ázirleý kezinde keńesip, jobalar men baǵdarlamalardy birlese júzege asyratyn boldy. Atalǵan agenttik qazirdiń ózinde otandyq áriptesterimen shyǵarmashylyq ındýstrııany damytýdyń óńirlik standartyn engizý tájirıbesin bólisýge daıyn.
