Foto: techliter.ru
Shetelde bar úrdis bizge endi kelgendeı. Ol – qoıma bıznesi. Iri saýda taýaryn nemese jıhaz jınaıtyn emes, shaǵyn ári baǵaly zattardy senip tapsyratyn oryn. «Sandyq» JShS basqarýshysy Mıras Sábıtovtiń aıtýynsha, bul bıznes túri Astana men Almaty qalasynda bar. Kólemi 2-3 sharshy metr ǵana bolatyn ár qoımaǵa adamdar artyq múlkin tapsyryp, aqysyn tóleıdi.
«Biz de sheteldegi tájirıbege súıendik. 2020 jyly osy kásip oıǵa kelip, qolǵa aldyq. Búginde Astana qalasynan tórt jerden oryn ashyldy. Ár qoıma, bizdiń tilmen aıtqanda «ıacheıka-uıashyqtardyń» barlyq qosyndysy – 3 100 sharshy metr. 13 adam turaqty jumys isteıdi. Qoımaǵa tapsyrys beretinderdiń kóbi – páterden-páterge kóship júrgen adamdar. Qoımaǵa kelip, arnaıy QR-kod arqyly esik ashyp, óziniń kerekti taýarlaryn alyp, qaıta salyp ketýge de bolady. Biz ony baza arqyly syrttaı ǵana qadaǵalap, kim kelgenin, qandaı zat alyp ketkenin kórip otyramyz. Iаǵnı nysan tolyq beınebaqylaýmen jabdyqtalǵan. Aldaǵy ýaqytta ózge qalalarda da dál osyndaı bıznesti iske asyrýymyz múmkin», deıdi ol.
Mundaǵy qoımalardyń árqaısysynyń kólemi ártúrli. Úlken kólemdileri de jeterlik. Tólemaqysy da ártúrli.
«KANSUL» jeke kásipkerliginiń quryltaıshylary Qanat Úmbetalınov pen Sultan Oshaqbaev ta jyl basynda 1 400 sharshy metrdi jalǵa alyp, dál osy kásiptiń basynda júr. Jastyq jigerdiń arqasy bolar, bul qoımaǵa da astanalyqtar úlken senim bildiredi. Kásip ıeleriniń aıtýynsha, joba quny 60 mıllıon teńgege jýyqtaǵan.
«Árıne, azamattar jańa páterge kóshken soń ishin jańa jıhazben toltyrǵysy keledi. Mundaıda buryn qoldanbaǵan, tipti sý jańa zattar jınalyp qalady. Sosyn bizdiń kómegimizge júginedi. Shaǵyn qoımalardy jalǵa alý ári ketse 1 jylǵa 100 myń teńgeden asady. Bir aıǵa ǵana jaldasa 4 000-5 000 teńgege shyǵýy múmkin. Demek kúnine 140-160 teńgeden jalǵa alasyz degen sóz», deıdi Sultan Oshaqbaev.
Qalaǵa qonys aýdaryp, páter tabylǵansha barlyq zatyn osynda ornalastyratyndar kóp eken. Kásipkerlerdiń sózine súıensek, satylymǵa shyǵatyn zattaryn, ıaǵnı onlaın saýdamen aınalysatyn kásipkerler de osynda ımporttyq taýarlaryn ornalastyrady. О́ıtkeni olardyń zattaryna kóp oryn qajeti joq.
«Mysaly, bizde bir tapsyrys berýshi bar. Jeke stomatologııalyq bıznes ashqan. Endi oǵan keletin ımporttyq dárilik preparattar men qosymsha qurylǵylardy udaıy bizge senip tapsyrady. Sodan soń qalaǵanynsha kerektisin qoımadan alyp ketedi. Sonymen qatar Qytaı nemese Túrkııadan onlaın taýar aldyryp, bıznes júrgizip júrgender de qyzmetimizge jıi júginedi. Mysaly, kıim-keshek, balalar oıynshyǵy nemese túrli turmystyq buıymdar. Olar dúkendi jalǵa ala almaıdy, sebebi olardyń jalǵa alý quny tym qymbat. Al keıbir stýdentter jazǵy kanıkýlǵa attanǵanda, páterin bosatyp, qystyq kıim, jeke múlikterin saqtaýǵa tapsyrady. Joǵaryda aıtqandaı, qoıma baǵasy qoljetimdi», deıdi olar.
Qos qoımada da órt qaýipsizdik erejeleri saqtalǵan. Ylǵaldylyqqa qarsy, ıaǵnı zattardy óz temperatýrasynda qurǵaq saqtaýǵa kepildik berilgen. Jeke kúzet qyzmetinen bólek, barlyq jerge beınebaqylaý ornatylǵanyn baıqadyq. Onsyz bolmaıtyny da belgili. «Halyq senip tapsyrǵan zatqa muqııat bolý kerek», deıdi jeke kásipkerler.
