Foto: primeminister.kz
Memleket basshysy Qasym-Jomart Toqaev pen Koreıa Prezıdenti Iýn Sok Ioldiń kelissózderi barysynda qol jetkizilgen ýaǵdalastyqtardy odan ári iske asyrý máseleleri talqylandy. Saýda-ekonomıkalyq yntymaqtastyqty keńeıtýge, ónerkásip, energetıka, avıasııa jáne basqa da salalardaǵy ózara is-qımyldy kúsheıtýge nazar aýdaryldy.
«Qazaqstan saýda-ekonomıkalyq áriptestikti damytýda úlken perspektıvalardy kórip otyr. Ekijaqty yntymaqtastyqtyń serpindi damýyn qamtamasyz etý maqsatynda Úkimet joǵary deńgeıde qol jetkizilgen barlyq ýaǵdalastyqtardy júzege asyrýǵa birden kirisýge daıyn», dedi Oljas Bektenov.
Qazaqstan energetıka, sırek kezdesetin jer metaldaryn ıgerý jáne qaıta óńdeý, ınfraqurylym, avtomobılder men olardyń komponentterin óndirý, sý resýrstaryn tıimdi paıdalaný, qarjy jáne basqa da perspektıvaly salalarda birlesken jobalardy iske asyrýǵa múddeli.
О́ńdeý sektoryn damytý — Memleket basshysynyń ekonomıkany ártaraptandyrý jónindegi tapsyrmasyn oryndaý maqsatyndaǵy Qazaqstan Úkimeti jumysynyń basym baǵyttarynyń biri. Búgingi tańda koreı kompanııalary Qazaqstanda mashına jasaý isin damytýǵa ınvestısııa salý boıynsha joǵary kórsetkishke jetti.
Elimizde avtomobıl klasterleri qurylyp jatyr, quramdas bólshekter óndirisin retke keltirý de josparlanǵan. Mysaly, Almatyda Hyundai markaly avtomobılderdi shaǵyn toraptyq qurastyrý, Qostanaı oblysynda KIA brendi avtomobılderiniń óndirisi, Semeı qalasynda Daewoo Bus Global avtobýstarynyń birlesken óndirisi jolǵa qoıylǵan. Jaqyn arada koreıalyq kompanııalar Qazaqstanda avtomobılderge arnalǵan oryndyqtar men mýltımedıa shyǵara bastaıdy.
Taıaýda qol qoıylǵan kelisimderdi eskere otyryp, koreıalyq kompanııalardyń qatysýyn odan ári keńeıtý jáne iri korporasııalardyń óndirisin lokalızasııalaý úshin jańa perspektıvalar ashylyp jatyr.
Qazaqstannyń Ońtústik Koreıa tehnologııalaryn qoldana otyryp, elektrokarlarǵa arnalǵan akkýmýlıatorlardy óndirýge qyzyǵýshylyǵy bar. Oljas Bektenov avtomobıl ónerkásibindegi yntymaqtastyqty odan ári nyǵaıtýǵa jáne koreıalyq tarap elimizdiń avtomobıl ónerkásibi úshin otandyq kadrlar daıarlaý isine kómektesýge múddeli ekenin atap ótti.
Sonymen qatar Qazaqstan men Koreıa basym salalarda tehnologııalarmen almasýdy jáne jobalardy birlesip iske asyrýdy jandandyrýda. Qaldyqtardy suryptaý, qaıta óńdeý jáne joıý salasynda qoqys óńdeý zaýytyn salý jobasy perspektıvaly bolyp otyr.
Metallýrgııa salasynda ferroqorytpalar óndirisin jolǵa qoıý kerek. Geologııa salasynda sırek kezdesetin jer metaldaryn birlesip óndirý jáne qaıta óńdeý qajet, sondaı-aq keıinnen ózara tıimdi sharttarda Koreıaǵa jetkiziletin joǵary óńdelgen ónimderdi Qazaqstanda shyǵarý salasynda yntymaqtastyq ornatý kózdelgen.
Sýtegi energetıkasy da yntymaqtastyqtyń perspektıvaly baǵyttarynyń birine aınalýy múmkin. О́z kezeginde lıft jabdyqtaryn óndirýdi lokalızasııalaý qurylys nysandarynyń qaýipsizdigin arttyrady. Avıasııada mádenı-gýmanıtarlyq, iskerlik baılanystardy nyǵaıtý maqsatynda jańa jolaýshylar áýe baǵyttaryn ashý máselesi pysyqtalady. Bul ótken jyly Qazaqstanǵa kelgen koreılik týrıster sanynyń eki ese artýyna baılanysty qajet bolyp otyr.
