Foto: kazgazeta.kz
Oblystyq polısııa departamenti baspasóz qyzmetiniń málimetine súıensek, júrgizýshiler tarapynan kúre jolda jyldamdyqty shamadan tys asyrý deregi azaımaı otyr. Máselen, tórt aıda 39 myńnan astam júrgizýshiniń jyldamdyqty shekten asyrǵany tirkelip otyr. Onyń ishinde 16 myńnan astam júrgizýshi saǵatyna 130-dan 180-ge deıingi jyldamdyqpen júıtkigeni anyqtalypty. Sondaı-aq 107 jol-kólik oqıǵasy tirkelip, 23 adam qaza tapqan. Al 6 mamyrdan beri birjolaqty joldy kesip ótken 42 júrgizýshi 6 aıǵa kólik júrgizý quqyǵynan aıyrylǵan.
Jolda júrý erejesin buzýshylar qatarynda moped júrgizýshiler de bar. Qos dóńgelekti kólikti tizgindegenderdiń deni – jastar. Tipti keıbiriniń qujaty da joq. Atyraý oblystyq jergilikti polısııa basqarmasynyń basshysy, polısııa polkovnıgi Erlan Bıǵambaevtyń málimetinshe, moped júrgizýshileri jyl basynan beri 371 ret jol erejesin buzǵan.
«Moped júrgizýshileriniń jol erejesin buzý deregine taldaý jasaldy. Taldaýǵa sáıkes olardyń basym bóligi jyldamdyqty shamadan tys asyrady. Aldyndaǵy kólikti basyp ozýǵa umtylady. Tipti baǵdarshamnyń qyzyl túsine toqtamaı ótip ketedi. Osyndaı sebeptermen moped júrgizýshileriniń kinásinen 17 jol-kólik oqıǵasy tirkeldi», deıdi E.Bıǵambaev.
Polısııa polkovnıginiń málimdeýinshe, 12 jasóspirimniń qujatsyz motokólikti júrgizgeni anyqtalǵan. Motokólik júrgizýshileri ushyraǵan jol apatynan 25 adam túrli dene jaraqatyn alyp, 1 adam qaza tapqan.
«Máselen, Qyzylqoǵa aýdanynyń Muqyr aýylynda ruqsat qujatynsyz motokólikti júrgizgen 19 jastaǵy stýdent tórt jasar balany qaǵyp qulatqan. Basynan jaraqat alǵan balaqaı aýrýhanaǵa jetkizildi. Ol áli kúnge deıin dárigerlerdiń baqylaýynda. Al 17 jastaǵy bozbala mopedpen 16 jastaǵy boıjetkendi qaǵyp, oqıǵa ornynan qashyp ketti. Patrýldik polısııa qyzmetkerleri atalǵan mopedtiń qaı baǵytta bara jatqanyn anyqtap, toqtatýǵa tyrysty. Alaıda jasóspirim zańdy talaptardy oryndamady. Sol sebepten patrýldik polıseıler ony májbúrli túrde toqtatty», deıdi E.Bıǵambaev.
Polısııa departamentiniń erekshe tapsyrmalar jónindegi aǵa ınspektory Amanjol Jumalıevtiń aıtýynsha, bir aptada 7 jol apaty tirkelgen. Jol-kólik oqıǵasynyń saldarynan 6 adam qaza taýyp, taǵy úsheýi aýyr dene jaraqatyn alǵan. Máselen, 16 mamyr kúni respýblıkalyq mańyzy bar «Atyraý – Aqtóbe – Astrahan» tasjolynyń 795-shaqyrymy tusynda «Lexus» avtokóligi birneshe ret aýdarylǵan. Buǵan sebep – 1987 jylǵy júrgizýshisiniń rýlge ıe bola almaǵany.
«Dál osy jol apatynan 3 adam jantásilim etti. Eki jolaýshy jaraqat aldy. Al 18 mamyrda atalǵan joldyń 571-shaqyrymynda 61 jastaǵy júrgizýshisi «Tank-500» avtokóligimen jaıaý júrginshini qaǵyp ketti. Jaıaý júrginshi oqıǵa ornynda kóz jumdy. Inder aýdanynyń Bódene aýylynda 16 jastaǵy jasóspirim motokólik júrgizýshisi jaıaý kele jatqan qurdasyn qaqqan. Saldarynan jasóspirim oqıǵa ornynda kóz jumdy. Al 19 mamyr kúni Inderbor kentinde 37 jastaǵy jigit esepte joq motokólikpen kedergige soǵylyp, qaıtys boldy», deıdi A.Jumalıev.
Júrgizýshilerdiń arasynda jol erejesin buzǵanymen qoımaı, aıyppulyn tóleýdi «umytyp» ketetini de bar. Sondaı boryshkerdiń biri 27 mamyrda ustaldy.
«Kúndizgi saǵat 16.20 shamasynda jedel basqarý ortalyǵynyń qyzmetkerleri Q.Sátbaev-I.Taımanov kósheleriniń qıylysynda «Nissan» avtokóligin toqtatty. Patrýldik polısııa batalony qyzmetkerleriniń tekserýi kezinde kólik júrgizýshisiniń 3 mln 771 myń teńge aıyppulyn tólemeı júrgeni anyqtaldy. 46 jastaǵy azamat kólik júrgizý quqyǵynan aıyrylǵanyna qaramastan, rýlge otyrǵan. Oǵan qatysty Ákimshilik quqyq buzýshylyq týraly kodeksiniń 612-babynyń 3-bóligimen ákimshilik hattama toltyryldy», dep habarlady qalalyq polısııa basqarmasynan.
Polısııa qyzmetkerleri jınaqtalǵan is qujattaryn mamandandyrylǵan ákimshilik sotqa joldady. Al avtokólik aıyp turaǵyna qoıyldy.
Atyraý oblysy
