Nurtas Qalıbekovtyń medısınany tańdaýyna alǵash anasy oı salypty. Sony sanasyna quıyp alǵan oıyn balasy óse kele bala armanynan aınymapty.
– О́zim Shyǵys Qazaqstan oblysy Zaısan qalasynyń týmasymyn. Bala kúnimde anam «sen túbi dáriger bolasyń, seniń bolmysyń, mineziń dárigerge keledi» dep aıtatyn. Sodan dárigerlikke erte jastan áýes boldym. Áne-mine degenshe, Astanadaǵy medısına ýnıversıtetine oqýǵa tústim. Ýnıversıtettegi alǵashqy jyldar men aqyly negizde oqyǵan soń ba, áıeýir qıyn boldy. Oqýdy orta joldan úzsem be eken degen oı keldi. Jaqyndarymnyń qoldaýymen áıteýir jınaqtalyp, oqýymdy jalǵastyrýǵa bel býdym. Joǵary kýrsta hırýrgııa salasyn tańdadym. Sol kez 7 kýrsta emhananyń shuǵyl hırýrgııasynda kezekshilikke túsip, operasııalardy kórip, úırenip júrdim. Internatýrany támamdap, dıplom alǵan soń, rezıdentýrada oqydym. Ol kezde osy onkologııa ortalyǵy respýblıkalyq shuǵyl medısınalyq kómek aýrýhanasy edi. Osynda salaǵa daǵdylanyp, mamandyqty tereńirek zerdeleı bastadym. Asan Jeksembaev sekildi bilgir professordyń tálimin aldyq, – deıdi N.Qalıbekov.
2015 jyly mekeme Ulttyq ǵylymı onkologııa ortalyǵy bolyp bekigende, basshylyq dárigerlerdi bólek-bólek baǵytqa nusqaǵan. Sonda Nurtas Qalıbekov ókpe, óńesh obyry baǵytyn tańdap, bólimde Aleksandr Dıgaı syndy bilikti dárigerlerdiń sharapatyn kórgen. Osylaısha, keıipkerimiz alǵashynda tek pasıenttiń ish, ót qurylystaryna operasııa jasasa, 2015 jyldan keıin keýde qýysyna operasııa jasaýǵa daǵydylana bastaǵan. Sóıtip júrip, Koreıa, Izraıl jáne basqa da Eýropa elderinde tájirıbesin shyńdaýǵa barǵan.
– О́kpe obyry – óte kúrdeli aýrýlardyń biri. Naýqastar óte kóp. Byltyr bizge 130 naýqas kelse, sonyń ishinde 70 naýqastan ókpe obyry anyqtalyp, olarǵa operasııa jasadyq. Basqasy, qatersiz isik, týberkýlezge shaldyqqandar edi. Olarǵa da járdemdestik. Qazirgi operasııalar burynǵydaı emes, biraz shıraǵan. Sheteldik ozyq tájirıbeni paıdalanamyz. Sala jyldan jylǵa jetilip keledi. Ár naýqasty ózimniń týsymdaı kóremin. Eger meniń týystarym osyndaı jaǵdaıǵa tap bolsa, ne ister edim degen saýaldy ózime qoıamyn. Torakaldy hırýrgııaǵa kelgende eń birinshi shaǵyn operasııa jasadyq. Oǵan 6 saǵat jumsaǵanbyz. Sonda qasymdaǵy hırýrg «buryn jasaǵansyń ba» dep suraǵan. «Joq», dep birinshi ret jasap jatqanymdy aıtqan edim, ol tańqaldy. Alty jyl ótti, álgi pasıent áli kúnge habarlasyp turady. О́kpeniń tamyrlary úlken bolady. Ol qanap ketse qıyn. 10-20 sekýndtyń ishinde tamyrdy ustap qalý kerek bolady. Álgi operasııadan keıin araǵa shamamen eki aı salyp, týra sondaı jaǵdaıda taǵy bir naýqas keldi. Operasııa kezinde qan ketti. Tamyrdy lezde qysyp ustap úlgerdik. Pasıenttiń qan qysymy 40-qa bir-aq tústi. Sonda sektor meńgerýshisi Meıram Asqaruly bári durys ekenin aıtty. Men tamyrdy qysyp turyp, basqa bir tusty keskende qolymdy qosa tilip ótippin. Sol kezde meńgerýshimiz qolyńdy al endi men qysaıyn dese, tamyrdy tas qylyp ustaǵan men alaqandy ázer ashqanmyn. Qolymnan qan saýlap jatyr. Operasııa sátti aıaqtalyp, operasııadan keıin kesilgen qolymdy tikkenimiz bar,– dep eńbek jolyndaǵy alǵashqy jyldaryn eske aldy N.Qalıbekov.
Osy jaǵdaıdan keıin tájirıbeli hırýrg úreılenbeı, kerisinshe, shynyǵyp, qaıta operasııa jasaýǵa kirise bastaǵan. Qazir jylyna shamamen 150-ge jýyq operasııa jasaıdy. Dáriger qaterli isik neǵurlym erte satyda anyqtalsa, emi jeńilirek bolatynyn aıtady. Iаǵnı pasıenttiń ómirin uzartýǵa múmkindik kóbirek bolady. Al isik asqynǵan bolsa, jaǵdaı qıyn. Munyń barlyǵyn dárigerler pasıentke, týystaryna baıyppen naqty túsindirip aıtady. N.Qalıbekovtiń aıtýynsha, qaterli isik jastarda agressıvti túrde ótedi. Tez taralady. Olarǵa dáriger habardy aıtarda erik-jigerin jıyp, ózin barynsha salmaqty ustaýǵa tyrysady.
Keıipkerimiz jary Merýert Kalıbekovamen bir topta oqypty. Qazir úlgili otbasy tórt bala tárbıelep otyr. Merýert qalalyq onkologııa ortalyǵynda sáýlelik dıagnostıka dárigeri. Nurtas Qalıbekov minezi salmaqty, artyq-aýys sóılemeıtin úlken ulyna «sen túbi dáriger bolasyń, seniń bolmysyń, mineziń dárigerge keledi» dep kezinde óz anasy aıtqan sózdi qaıtalap otyrady eken. Biraq ákesiniń jumystan kesh keletinin, keıde tún jarymda jumysqa baratynyn kórip-bilip júrgen bala dáriger bolýǵa qazirden júreksinetin kórinedi. Bir jaǵy ákesiniń talaı adamnyń júregine úmit uıalatqan dáriger ekenin túsinetindeı.
