Foto: Instagram/drs_kz
Sportshylar áýletinde dúnıege kelgen Marııa Brovkovanyń anasy men ápkesi kanoe men baıdarkada eskek esýmen aınalysqan. (Qazirgi ýaqytta ekeýi de bapker).
Olımpıadaǵa qatysý armany 2016 jylǵy Rıo Olımpıadasynan keıin paıda bolǵan, sol kezde ol 11 jasta eken.
«Anammen syrlasyp otyryp, mindetti túrde Olımpııa oıyndaryna qatysatynymdy aıttym. Árıne, Tokıo Olımpıadasyna bara almaıtynym áýelden belgili edi. О́ıtkeni ol kezde ulttyq quramaǵa kirgen joqpyn. Biraq qalaıda Olımpıadaǵa baratynymdy aıttym. Sóıtip alǵa úlken maqsat qoıyp, 8 jyl ótkende armanyma qol jetkizip, anama bergen sózimde turdym», deıdi sportshy.
Kanoe men baıdarkada eskek esýden ulttyq quramanyń bas bapkeri Qaısar Nurmaǵambetovtiń aıtýynsha bolashaǵynan úmit kúttiretin jas sportshylardyń biri Marııa Brovkova jastar arasyndaǵy álem chempıonatynda úsh márte top jardy jáne birneshe halyqaralyq jarystarda júldegerler qatarynan kórindi.
«Tórt jyldyqtyń basty dodasyna qatysatynymyzdy, jankúıerler bizge úlken úmit artyp otyrǵanyn jete sezinip, Parıjge jaqsy daıyndyqpen barý úshin tynbaı eńbektenip jatyrmyz», deıdi Marııa.
Eskek esý sportynda Tokıo Olımpıadasynyń chempıony amerıkalyq Nevın Harrısondy úlgi tutatyn Marııa amerıkalyq sportshynyń qadamyn 2020 jyldan beri baqylap júrgenin aıtady.
«Jeńiske degen qulshynysymen, erik-jigerimen, myqtylyǵymen tańǵaldyrdy. Harrıson óziniń alǵashqy Olımpıadasyna 19 jasynda qatysyp, chempıon atanǵan-dy. Men de bıyl 19-ǵa toldym jáne alǵashqy Olımpıadama baramyn. Nevınniń úsh jyl burynǵy jetistigin qaıtalap, Parıjde Olımpıada chempıony atanǵym keledi», deıdi Marııa Brovkova.
