Atalǵan jobanyń elimizde ázirshe balamasy joq. Bul EN 206-2017 eýropalyq standarttaryna sáıkesetin ozyq qurylys materıaldaryn engizý úshin qurylǵan. Kásiporyn ınnovasııalyq qurylys materıaldary segmentinde jol, ónerkásiptik jáne azamattyq qurylys naryǵynda jumys isteýge baǵyttalǵan keleshegi mol joba.
Zaýyt óniminiń negizinde otandyq ǵalymdardyń ǵylymı-tehnıkalyq zertteýleri men ázirlemeleri, atap aıtqanda, kúrdeliligi joǵary ǵımarattardy turǵyzatyn taýarlyq quıylǵan modıfıkasııalanǵan beton bar. Joba jetekshisi – T. Básenov atyndaǵy sáýlet jáne qurylys ınstıtýtyndaǵy «Qurylys jáne qurylys materıaldary» kafedrasynyń meńgerýshisi Danııar Ahmetov.
Jańa zaýyt basshysynyń aıtýynsha, kásiporyn ozyq tehnologııamen jáne joǵary sapaly quıylǵan modıfıkasııalanǵan betondy óndirýge tózimdi biregeı qural-jabdyqpen qamtylǵan. Bir jaǵynan, elimizde alǵash ashylyp otyrǵan bul zaýyt EN 206 jáne GOST 7473 Eýro standarty boıynsha kez kelgen markaly ózdiginen tyǵyzdalatyn jáne quıylatyn betondardy shyǵarýǵa arnaıy jobalanyp, tehnologııalyq baǵdarlanǵan. О́zdiginen tyǵyzdalǵan beton alǵash ret 1988 jyly kúrdeli geometrııalyq pishindegi berik beton konstrýksııalaryn jasaý úshin jasalǵan. Sodan beri ony arnaıy betonnan standartty betonǵa aınaldyrý maqsatynda ǵalymdar kóptegen zertteý júrgizdi. Mamandar jergilikti shıkizat komponentteri men tehnogendik óndiris qaldyqtaryndaǵy beton qospasynyń quramyn jobalady.
Mundaı joǵary tehnologııalyq materıaldardy paıdalaný qysqa merzimde mańyzdy ınfraqurylymdyq ǵımarattar salýǵa múmkindik beredi. Bul qorshaǵan ortaǵa júktemeni de azaıtady.
Aıta keteıik, jobany zaýyt qurylysyna grant bólgen «Ǵylym qory» qoldaǵan.
