Is-sharanyń negizgi maqsaty – aǵa býyn jáne óskeleń urpaqtyń arasyndaǵy sabaqtastyqty jandandyrý.
Tálim-tárbıelik máni erekshe osy jıynda sóz alǵan agenttik tóraǵasy Darhan Jazyqbaı «Qoǵamdy izgilikke tárbıeleýde, urpaqtyń sana-sezimin, oı-órisin keńeıtýde ádebıettiń atqaratyn róli erekshe» deı kele, kezinde ádebıet pen memlekettik qyzmetti qatar alyp júrgen, eldik murattardy nasıhattap, táýelsizdiktiń tuǵyryn nyǵaıtýǵa úles qosqan aǵa urpaqtyń qalamgerlik jáne qaıratkerlik bolmysyna arnaıy toqtalyp, qonaqtarǵa kezdesýge arnaıy qatysqany úshin alǵysyn bildirdi.
Agenttik tóraǵasy qalamgerlerdi Memleket basshysy
Kasym-Jomart Toqaev jarııalaǵan «Ádiletti Qazaqstan – Adal azamat» qaǵıdatyn ilgeriletýge, memlekettik apparat ókilderiniń boıynda ádildik, adaldyq, memleketshildik syndy qasıetterdi ornyqtyrý isine atsalysýǵa shaqyrdy. Osy oraıda «Adal azamat» qundylyqtaryn beıneleıtin,memlekettik qyzmetshilerdiń jaǵymdy beınesin qalyptastyrýǵa yqpal etetin jańa týyndylar jazýǵa usynys bildirdi. Ondaı shyǵarmalardyń tartymdy bolýy úshin, memlekettik qyzmettiń qyr-syryn jetik biletin jazýshylar qalam tartyp jatsa týyndynyń mazmuny shynaıy da áserli shyǵatynyn atap ótti.
Ýálıhan Qalıjanuly, Jabal Erǵalıuly, Joltaı Álmashuly, Roza Muqanova, Azat Ákim syndy jazýshy qalamgerler óz tájirıbelerin bólisip, oılaryn ortaǵa saldy. Memlekettik qyzmetshiler men Memlekettik basqarý akademııasynyń tyńdaýshylarynyń qoıǵan saýaldaryna jaýap berip, pikir almasty.
Shara sońynda «Ádiletti Qazaqstan – Adal Azamat memlekettik qyzmetshilerdiń kásibı jáne tulǵalyq bolmysy» atty kitaptyń tusaýy kesildi.
Kitaptyń mazmunynda ulttyq múdde, memlekettik sana, ádildik, ashyqtyq, antqa adaldyq syndy qaǵıdattar kórsetilip, olardy ózekti ustanym retinde usyný arqyly memlekettik apparattyń damýyna jańasha serpin berý kózdelgen.
Týyndy avtory Darhan Jazyqbaı usynylyp otyrǵan eńbekte jańa formasııadaǵy memlekettik qyzmetshilerge tán basty ustanymdar men qaǵıdattar týraly jazylǵanyn, olar memlekettik qyzmetshilerdiń sanaly jańǵyrýyna, olardyń boıynda jańa mádenıet pen jańasha qundylyqtar qalyptastyrýǵa baǵyttalǵanyn atap ótti.
