Kollajdy jasaǵan – Qonysbaı ShEJIMBAI, «EQ»
Árbir komıýnıtı ortalyqta qoǵamdyq keńistik, psıhologııalyq, zań kómegi, jumysqa ornalastyrý, kásiptik baǵdar berý, kásipkerlik máseleler boıynsha keńes berý, sondaı-aq jastar ıdeıasyn jedeldetýge arnalǵan kovorkıng aımaq bar. Mundaı ortalyqtarda jyl basynan beri 750-den astam is-shara ótkizilip, 30 myńnan astam jas qatysqan. «Onaı» kartasy negizinde komıýnıtı ortalyqtardyń rezıdentteri úshin klýbtyq kartochkalyq júıe engizilgen. Qoǵamdyq kólikte paıdalanýmen qatar kartada tamaqtaný, sporttyq jáne mádenı ınfraqurylymdarda, sheberlik dáristerine jáne basqa da áleýmettik is-sharalarǵa qatysý barysynda dıskont jeńildigi qarastyrylǵan.
Jaqynda qala basshysy Erbolat Dosaev Jetisý aýdanynda ornalasqan osyndaı ortalyqtyń jumysymen tanysyp, ár aýdanda ashylyp jatqan komıýnıtı ortalyqtar jumysynyń oń nátıje berip jatqanyn atap ótti. Nátıjesinde, osy jyldyń birinshi toqsanynda 9 myńnan astam azamat jumysqa ornalasyp, osy kezeńde jastar arasyndaǵy jumyssyzdyq deńgeıi 5,2-den 4,6 paıyzǵa tómendegen.
Jalpy aýdany 645 sharshy metr jańa ǵımaratty salýda ınklıýzıvti qadamdar eskerilipti. Zamanaýı kreatıvti qoǵamdyq keńistikte jastar memlekettik baǵdarlamalar boıynsha keńes alyp, psıhologııalyq jáne zańgerlik kómekke, jańa mamandyq alý boıynsha qysqamerzimdi kýrstardan ótýge múmkindik alyp, mádenı jáne sport alańdarynda bos ýaqytyn tıimdi ótkizetin bolady.
Búginde Almatyda turyp jatqan 14-35 jas aralyǵyndaǵy jastardyń sany 680 myńǵa jýyqtaıdy. Olardyń 60 myńǵa jýyǵy Jetisý aýdanynda turady desek, jumyssyz jastardyń úlesi 6 paıyz. Komıýnıtı ortalyǵy mamandarynyń aıtýynsha, jastardy áleýmettendirý jumystary qanshalyqty tartymdy bolǵan saıyn, olardyń qoǵamdyq ómirge belsene aralasýy da soǵurlym nátıjeli bolatyny anyq. Qalada jastarǵa arnalǵan 30-dan astam demalys ortalyǵy da jańartylǵan.
ALMATY
