Foto: Orda.kz
Salmaqty sammıt jumysyna oraı álemge belgili tájirıbege sáıkes ýákiletti memlekettik organdar keletin sheteldik delegasııalardyń, olardyń ishinde memleket basshylary men halyqaralyq uıymdar basshylarynyń qaýipsizdigin joǵary deńgeıde qamtamasyz etýge tolyqqandy sharalar qabyldaıdy.
«Terrorızmge qarsy is-qımyl týraly» Zańnyń 12, 13 jáne 15-baptaryna sáıkes kúzetiletin tulǵalardyń qaýipsizdigin qamtamasyz etý boıynsha kúzet is-sharalaryn ótkizý kezinde Terrorızmge qarsy kúres jónindegi respýblıkalyq jedel shtabtyń basshysy retinde Qazaqstan Respýblıkasy Memlekettik kúzet qyzmeti bastyǵynyń sheshimi boıynsha Astana, Almaty, Qaraǵandy jáne Kókshetaý qalalarynyń jekelegen ýchaskelerinde terrorızmge qarsy operasııanyń quqyqtyq rejıminde quqyqtyq tártip pen qoǵamdyq qaýipsizdikti qoldaý is-sharalary ótedi. Quqyqtyq rejım 2 shildeniń 00 saǵat 01 mınýtynan bastap 4 shildeniń 23 saǵat 59 mınýtyna deıin Shanhaı yntymaqtastyq uıymynyń sammıti ótkiziletin obektiler aýmaǵyna jáne kúzetiletin tulǵalardyń júrý baǵyttaryna ornatylady, delingen Ulttyq qaýipsizdik komıtetiniń habarlamasynda.
Kúzetiletin tulǵalar Aqmola, Qaraǵandy oblysy men Almaty qalasy aýmaǵyna barǵan jaǵdaıda olar kelgen kezeńge jáne atalǵan óńirlerde bolatyn oryndarda terrorızmge qarsy operasııanyń quqyqtyq rejımi ornatylady.
Terrorızmge qarsy operasııa ótkizý aımaqtarynda kúzetiletin tulǵalar bolǵan ýaqytta atalǵan aımaqtarda adamdardyń jáne avtokólikterdiń qozǵalýyna shekteý engiziledi.
Kúzetiletin tulǵalardyń júretin arnaıy joldarynda qalalyq jolaýshylar kólikteriniń qozǵalysy da toqtatylady. Al bul ózgerister týraly Astana qalasy ákimdiginiń resmı aqparattyq portaly habarlady.
«Qazaqstan Respýblıkasy Prezıdentiniń 2013 jylǵy 9 tamyzdaǵy №611 Jarlyǵymen bekitilgen «Terrorızm aktisi qateriniń týyndaýy týraly aqparat monıtorınginiń jáne halyqty habardar etýdiń memlekettik júıesiniń uıymdastyrylýy men jumys isteý qaǵıdalaryna» sáıkes terrorızmge qarsy operasııanyń quqyqtyq rejımi engizilýin eskere otyryp, Astana, Almaty, Qaraǵandy jáne Kókshetaý qalalarynyń Shanhaı yntymaqtastyq uıymynyń sammıtin ótkizý obektilerinde 2 shilde 00 saǵat 01 mınýtynan bastap 4 shilde 23 saǵat 59 mınýtyna deıin terrorıstik qaýiptiliktiń birqalypty («sary») deńgeıi belgilenedi, dep jazdy UQK baspasóz qyzmeti.
Al terrorıstik qaýiptiliktiń birqalypty («sary») deńgeıi kezeńinde mynadaı tártip belgilenedi:
- jekelegen aýmaqtarda kólik pen jaıaý júrginshilerdiń qozǵalystaryna shekteý engiziledi;
- kınologııa qyzmetiniń mamandaryn tarta otyryp, kóshelerde, alańdarda, stadıondarda, skverlerde, saıabaqtarda, magıstraldi temirjol jelilerinde, temirjol vokzaldarynda, avtovokzaldarda, áýejaılarda, metropolıten obektilerinde, buqaralyq jáne jappaı is-sharalar ótetin oryndarda patrýlderdi kúsheıtedi;
- jarylǵysh qurylǵylardy anyqtaý jáne joıý boıynsha terrorıstik turǵydan osal obektilerge jáne adamdar kóp jınalatyn oryndarǵa, buqaralyq jáne jappaı is-sharalarǵa qatysýshylardyń qozǵalýlarynyń negizgi baǵdarlaryna tekserý júrgizedi;
- áýejaılarda, metropolıten obektilerinde, temirjol vokzaldarynda jáne avtovokzaldarda jete tekserý is-sharalaryn ótkizý barysynda arnaıy tehnıka quraldaryn paıdalaný arqyly rejımdik sharalardy kúsheıtedi.
