Jasandy ıntellekt arqyly onlaın aýdarmashyǵa jańadan 110 til qosyldy. Olardyń arasynda bes túrik tili bar. Atap aıtsaq, bashqurt, chývash, ıakýt, týva, sondaı-aq qyrym tatarlarynyń tilindegi mátinder endi ózge tilderge emin-erkin aýdarylady. Qyzmet onlaın úlgide, ınternetke kirý múmkindigi bar kez kelgen qoldanýshyǵa qoljetimdi. Kompanııanyń habarlamasynda aıtylǵandaı, jańartý 614 mıllıonnan astam adamdy nemese jer turǵyndarynyń shamamen segiz paıyzyn qamtıdy.
«Olardyń keıbiri – 100 mıllıonnan astam sóıleýshisi bar negizgi álemdik tilder. Al keı tilder jergilikti shaǵyn qaýymdastyqtarda ǵana qoldanysta. Tipti bul baǵdarlamaǵa ana tili joıylyp ketken halyqtardyń da sózderi engizilgen», dep habarlaıdy «Google» kompanııasy.
Onlaın aýdarmashy júıege qosylǵan barlyq til arasynda jeke sózder men sóılemderdi, mátinderdi, sondaı-aq tutas veb-paraqshalardy aýdarý múmkindigine ıe. «Google» aýdarmashynyń da basqa mashınalyq aýdarmashy quraldar sııaqty ózindik shekteýleri bar. Oqyrmanǵa shet tildegi mátinniń mazmundyq maǵynasyn túsindirýge kómekteskenimen, árdaıym naqty aýdarmany jetkizip bere almaıdy. Árıne, keń qoldanystaǵy keıbir tilderdiń aýdarma nátıjesi jaqsyraq bolyp keledi. Mysaly, «Google Translate» aǵylshyn tili men Eýropa odaǵy tilderi arasynda sapaly aýdarma jasaıdy.
Aıta keteıik, qazaq tili «Google» onlaın aýdarma júıesine on jyl buryn, naqtyraq aıtsaq, 2014 jyldyń 12 jeltoqsanynda qosyldy. Jyl ótken saıyn aýdarma sapasy jaqsaryp, bazadaǵy qazaq tiliniń sózdik qory arta túsken.
