Jylqylar men túıeler kóshe kezip, kólikterge kedergi keltirýde

Aqtaýda kóshe kezgen maldarmen kúresý – kóp jyldardan beri aıtylyp jáne sheshimin tappaı kele jatqan másele, endi olardyń qataryna Qambar ata men Oısylqara urpaqtary engizildi. Aqtaýda jasyl alańqaılar kózdiń qarashyǵyndaı qorǵa­­­lady. Sońǵy kezderi tártip pen tazalyq máselesi de myqtap qolǵa alynǵan. Iship-jegeni­niń qaldyǵyn kez kelgen orynǵa tastaı salǵandar sol boıda jergilikti telearna arqy­ly jalpaq jurtqa ájýá bolyp, óz qoqysyn qolymen kóterýge májbúr. Alaıda, qala mańyn­daǵy aýyldardyń maldary, ásirese, jylqylar qala ishinde saırandaýǵa qumar. Shaǵyn aýdandardyń o shetinen kirip, bu shetinen shyǵyp, keı jaǵdaı­larda jol-kólik qatynasyna kádimgideı qaýip tón­­diretin olar sýsyz aımaq alaqan­da aıalap otyrǵan jasyl alań­qaılar­dy áp-sátte otap, jýsap ketedi. Buǵan deıin Aqtaý qala­lyq ishki ister bólimi aıyp turaǵyna qamaǵanmen, ol tıimsiz bolyp tabylǵan. Endi qala kezgen qaraýsyz maldardy  qolǵa túsirgen polısııa qyzmetkerleri olardy mal soıý pýnktterine ótkiz­bek. Qazirgi tańda Aqtaýda tórt mal soıý pýnkti bar. Sol jerde ózge maldarmen birge sýarylyp, azyqtandyrylatyn maldardyń anyqtalǵan naqty ıeleri jemshóp aqysymen birge, aıyppul da tóleıtin bolady, al ıesi tabylmaǵan jaǵdaıda jylqylar etke ótkiziledi. Al Aqtaý qalalyq kás­ip­kerlik, aýyl sharýashylyǵy jáne veterınarııa bólimi qyz­metkerleri jýyq arada jeke maldardyń arnaıy belgi taǵýdan ótkiziletindigin, sodan soń «buzyq» mal ıelerin qınalmaı tabýǵa bolatyndyǵyn aıtýda. «Qorshaǵan ortanyń taza­lyǵyn saqtaýǵa túsinigi bar adam­dardy úıretý ońaı bolmaı turǵanda, mal balasyn úıretý qaıdan ońaı bolsyn» degen oı keledi eken... Sondaı-aq, Aqtaýda aqpan aıynan bastap, qańǵybas kúshikter men ıtterdi aýlaý jáne joıý jumystary júrgizilmek. О́tken jyldyń sońynda qurylǵan arnaıy veterınarlyq stansa uıymdastyratyn bul ju­mystar úshin arnaıy mobıldi jyljymaly krematorııler satyp alynýy múmkin. Gúlaıym ShYNTEMIRQYZY, «Egemen Qazaqstan». Mańǵystaý oblysy.