Kásiporyn 2015 jyldyń jeltoqsanynda «Bıznestiń jol qartasy-2020» memlekettik baǵdarlamasy negizinde qurylyp, Indýstrııalyq parkten jer telimin alǵan. 7 myń sharshy metrdi alyp jatqan aýmaqta óndiristik, qyzmettik jáne ákimshilik bólimderi ornalasqan. Odan bólek, ǵımarat syrtynda qyzmetkerlerge arnalǵan jataqhana, shıkizat pen daıyn buıymdarǵa arnalǵan qoımalar bar.
«Keńsege arnalǵan klassıkalyq úlgimen qatar, óndiristegi basshylyq quramnyń jáne jumysshylardyń jumys kıimin tigemiz. Sondaı-aq tótenshe jaǵdaı qyzmetkerleri, áskerı, kúzet, jol polısııasy, qarjylyq monıtorıng agenttiginiń keńselik kıimi, shahter, munaı-gaz ben temirjol salasyndaǵy jolserik azamattardyń jáne dánekerleýshilerge arnalǵan arnaıy toptamalarymyz bar. Bulardyń keıbirinde jazdyq jáne qystyq úlgidegi nusqasy qatar daıyndalady. Sporttyq kıimder de tapsyryspen tigiledi», deıdi kompanııadaǵy óndiris bóliminiń basshysy Merýert Qamzahanqyzy.
Kompanııa ókilderiniń aıtýynsha, Astana qalasy boıynsha kadr tapshylyǵy bar. Sondyqtan kóp tigin jabdyǵynyń operatorlaryn, ıaǵnı tiginshilerdi ózge óńirlerden shaqyrady. 100 oryndyq jataqhana da sol úshin salynǵan.
«Bizde 250 adam jumys istese, sonyń 200-ge jýyǵy – tiginshi. Bul bir aýysymdaǵy qyzmetkerler ǵana. Eger tapsyrys ulǵaıyp jatsa, eki aýysymǵa kóshýge múmkindigimiz jetkilikti. Ol kezde taǵy da maman izdeýge týra keledi. Ekinshiden, biz tender arqyly jumys istep kelemiz. Mysaly, «Qazaqstan temir joly» kompanııasymen eki jyl qatarynan birlese jumys istedik. Olar biz tikken arnaıy kıimdi tutynady. Bıyl da osy kompanııanyń konkýrsyna qatysyp jatyrmyz. Jalpy, ulttyq kompanııalar jarııalaǵan tenderdiń barlyǵynan shet qalmaımyz. Talaptarda kórsetilgendeı, óz kıim úlgilerimizdi kórsetip, kommersııalyq usynystarymyzdy qosa joldaımyz. Olar konkýrs ótetin kúndi belgilegen soń táýelsiz sarapshylar ónimderimizdi jiti qaraı otyryp, baǵalaıdy. Baǵaǵa qatysty egjeı-tegjeı jumystar da qatar júredi. Osylaısha, barlyq talap-tilekke saı biz tikken ónim úlgisi jeńiske jetse, tapsyrysty oryndaýshy retinde arnaıy kıimdi toptap daıyndaýǵa kóshemiz. Keıde óte tómen baǵa usynǵan ózge kásiporyndar konkýrstan jeńip ketedi. Al biz ónimniń tigilýi, mata sapasyna senimdi bolǵan soń konkýrstaǵy baǵamen kelispeı qalyp jatamyz», deıdi kásiporynnyń tehnologııa jáne ázirleme jónindegi dırektory Gúlnar Igembaeva.
Aıtýynsha, keıbir shıkizat, ıaǵnı mata túrleri kórshiles Reseıden keledi. Al keıbir tapsyrys berýshi quzyrly oryndar mataǵa qatysty óz usynysyn aıtyp, sol boıynsha arnaıy kıim tigiledi.
«Ortasha aılyq 250 myń teńgeden asady. Bul jerde eskeretin jaıt bar. Ol kásibı tiginshilerdiń eńbek ótili men sanatyna baılanysty. Soǵan oraı kólemi de artyp otyrady. Jumys josparyn ýaqtyly oryndaý da jalaqyǵa áser etedi. Kompanııa basshylyǵy ár toqsan saıyn qyzmetkerlerdi yntalandyrý úshin syıaqy berip turady. 100 oryndyq jataqhana baryn aıttyq. Qala ishinen avtobýstar belgilengen. Sonymen qatar qyzmetkerlerge keshendi túski as jáne tústen keıingi kishi as tegin beriledi», deıdi G.Igembaeva.
Kásiporynnyń basty maqsaty – otandyq ónim úlesin arttyrý. Sondaı-aq basshylyq el ishinen shyǵatyn ónimge tapsyrys berý múmkindigine memleket qoldaý kórsetse degen tilegin de jetkizdi.
