Foto:Instagram/police.atyrau
Eske sala keteıik, 2024 jyldyń 26 maýsymyna qaraǵan túni Atyraý qalasyndaǵy Jeńis saıabaǵyndaǵy alańda 2017 jyly týǵan qyzdyń ústine eskertkish qulaǵan edi. Búldirshin alǵan jaraqatynyń saldarynan oblystyq balalar aýrýhanasynda kóz jumdy.
Resmı málimetter boıynsha Atyraý oblysy polısııa departamentiniń tergeý basqarmasy balanyń qaıtys bolý faktisi boıynsha sotqa deıingi tergeý amaldaryn júrgizip jatyr.
«Osyǵan baılanysty oqıǵanyń naqty mán-jaıyn anyqtaý, istiń tolyq zerttelýin qamtamasyz etý úshin 2024 jyldyń 25 maýsymynda keshki ýaqytta bolǵan qylmystyq quqyqbuzýshylyqty kórgen jáne eskertkishti kóterýge kómektesken tulǵalar tergeý organdaryna habarlasýyńyzdy suraımyz. Atyraý qalasy, Ábilqaıyrhan dańǵyly, № 55 (№ 329 kabınet) mekenjaıy boıynsha bólimshege nemese 98-22-72, +7702-741-53-95, +7747-750-95-95 telefondary boıynsha habarlasyńyz», delingen Atyraý oblysy PD baspasóz qyzmeti taratqan habarlamada.
Osyǵan deıin Atyraý qalasynyń ákimi Shákir Keıkın qaıǵyly oqıǵa týraly aıtqan bolatyn. Ol tótenshe jaǵdaıǵa aýa raıy sebep bolýy múmkin degendi joqqa shyǵardy. Tótenshe jaǵdaı bolǵan kúni Atyraýda qatty jańbyr jaýyp, jel soqqany budan buryn da habarlanǵan bolatyn.
«Men ózim tájirıbeli qurylysshymyn, sondyqtan mundaı aýyr bıýsttiń qalaı qulaǵany men úshin jumbaq boldy. Qazir men ony ornynan jyljytýǵa tyrystym. Qurylym jeldiń saldarynan qulamaýy múmkin dep oılaımyn, biz Jeńis saıabaǵynda ornatylǵan barlyq eskertkishter men bıýstterdi tekseremiz», dep túsindirdi Shákir Keıkın.
Resmı málimet boıynsha, Atyraýdaǵy Jeńis saıabaǵyndaǵy «Estelik alleıasy» 2020 jyly ashylǵan. Munda Uly Otan soǵysy batyrlarynyń, Keńes Odaǵynyń batyrlarynyń, halyq qaharmandarynyń jáne «Dańq» ordeniniń tolyq ıegerleriniń 14 bıýsti qoıylǵan. Taqtalardyń biri qyzdyń ústine qulaǵan.
