foto: polisia.kz
Ishki ister mınıstrliginiń málimetinshe, kúdiktiler ózgelerdi qorqytý jáne ózderiniń basymdylyǵyn kórsetý maqsatynda zorlyq-zombylyq áreketterin beınejazbaǵa túsirip otyrǵan.
«Ulytaý oblysynda uıymdasqan qylmysqa qarsy kúres basqarmasynyń qyzmetkerleri 18-20 jas aralyǵyndaǵy jastar tobyn qolǵa túsirdi. Olar jergilikti kolledjdiń kámeletke tolmaǵan stýdentterin qorqytyp, aqsha bopsalaǵan. Bopsalaý jáne buzaqylyq faktileri boıynsha qylmystyq ister qozǵalyp, sotqa joldandy», dedi QR IIM uıymdasqan qylmysqa qarsy kúres departamentiniń ókili Qýandyq Alpys.
Pavlodar oblysynyń Polısııa departamenti uıymdasqan qylmysqa qarsy kúres basqarmasy prokýratýranyń úılestirýimen 2024 jyldyń mamyr aıynda jastardy bopsalaýmen aınalysqan toptyń áreketine tosqaýyl qoıdy.
Top múshelerine osyndaı 10 faktige qatysy bar degen aıyp taǵylyp otyr. Olar jábirlenýshilerdi qorqytyp, 2 mln teńgege deıin alǵan. Jábirlenýshiler qylmyskerlerden qorqyp, quqyq qorǵaý organdaryna júginbegen.
Zańsyz áreketterdiń saldarynan jábirlenýshiler sýısıd jasaýǵa da bel býǵan. Osyndaı oqıǵalardyń birinde qorlyq pen soqqyǵa shydamaǵan 22 jastaǵy jigit ózin-ózi óltirýge oqtalǵan. Top múshelerin ustaý kezinde olardan travmatıkalyq jáne sýyq qarý, sondaı-aq sıntetıkalyq esirtki tárkilendi. Barlyq kúdikti qamaýǵa alyndy. Jábirlenýshilerge qatysty qaýipsizdik sharalary qabyldandy. Qylmystyq kodekstiń birneshe baby boıynsha sotqa deıingi tergep-tekserý júrgizilip jatyr.
