Qazaqstan Ulttyq bankiniń habarlaýynsha, monetalar shyǵarylymy geolog-ǵalym, ǵylym jáne qoǵam qaıratkeri, professor, Qazaq KSR Ǵylym akademııasynyń tuńǵysh prezıdenti Qanysh Sátbaevtyń 125 jyldyǵyna arnalǵan. Akademıktiń dańqty esimi qala, ýnıversıtet, taý-ken metallýrgııa kombınaty, memorıaldyq mýzeı, ınstıtýttar, mektepter men kóshelerdiń ataýlarynda máńgi saqtalǵan. Onyń qurmetine elimizdiń kóptegen qalasynda eskertkishter ornatyldy. Tipti ǵalymnyń atyndaǵy ǵalamshar baryn da jaqsy bilemiz. Al Sátbaev monetasynyń aınalymǵa shyǵýy nur ústine nur emes pe?
Moneta nomınaly 2000 teńgelik jáne 200 teńgelik bolyp eki túrde shyǵady. Taralymy – 300 danamen shyǵatyn 2000 teńgelik monetada marganes rýdasynyń, mıneraldyń túsin bildiretin kúreń qyzyl túske ıe tantal saqınasy bar. Aıta keteıik, Qanysh Sátbaev Jezdi aýylynyń mańynan marganes rýdasyn taýyp ıgergen. Bul metall Ekinshi dúnıejúzilik soǵys kezinde brondy tehnıkaǵa arnalǵan bolat qorytpalar óndirisinde keńinen qoldanylǵan.
Al melhıor qospasynan daıyndalǵan 200 teńgelik moneta 5000 danamen shyǵady. Monetanyń massasy – 15 gramm, dıametri – 33 mm, sapasy – brilliant uncirculated.
Aıta keteıik, monetanyń barlyq túrin elimizdiń búkil aýmaǵynda óziniń belgilengen qunymen tólemniń kez kelgen túrinde qabyldaýǵa, bank shottaryna esepke alýǵa, aýdarýǵa, usaqtaýǵa jáne aıyrbastaýǵa bolady.
