Áýeli Qyzylbalyq aýyldyq okrýgine qarasty Kópbirlik aýlynda ulan-asyr toı boldy. Qos birdeı qýanyshqa kenelgen aýyl turǵyndarynyń mereıi tasydy. Bir ǵana aýyldyń ózinde aýyz toltyryp aıtatyn jańalyq kóp eken. Máselen, aýdan ortalyǵynan alysta jatqan aýylǵa deıingi tasjol jóndelip jatyr. Erte kóktemde bastalǵan jol jasaý jumystary jyl aıaǵyna deıin aıaqtalatyn túri bar. Sonymen qatar aýyldaǵy aýyzsý máselesi kóp jyldan beri sheshimin tappaı kele jatqan edi. Mine, osy bir kúrdeli istiń de kúrmeýi sheshilip, taza aýyzsýmen qamtylyp otyr. Osyndaı ilkimdi ispen qatar aýylǵa ákimdiktiń jańa ǵımaraty salynyp, lentasy qıyldy.
Jańa nysannyń saltanatty ashylý rásimine Qaratal aýdanynyń ákimi Ulan Dosymbekov, oblystyq dene shynyqtyrý jáne sport basqarmasynyń basshysy Ulan Rysqul, Qazaqstannyń eńbek sińirgen jattyqtyrýshysy, Qazaqstan Respýblıkasynyń qurmetti sport qaıratkeri Elsııar Qanaǵatov qatysyp, turǵyndardy qýanyshtarymen quttyqtady.
«Dene shynyqtyrý men sport arqyly ult saýlyǵyn jaqsartý baǵytynda elimizde barlyq jaǵdaı jasalyp keledi. Búgin ashylyp otyrǵan sport kesheni – sonyń aıqyn dáleli. Bul keshen jergilikti turǵyndardyń ıgiligine qyzmet etip, bolashaq álem chempıondary men júldegerlerin tárbıelep shyǵaratynyna senimim mol», dedi aýdan ákimi U.Dosymbekov.
Aýdan basshysy jyl boıyna istelip jatqan ıgilikti isterdi saralaı kele, aýyl turǵyndary men ǵımaratty salǵan merdiger kompanııaǵa alǵysyn aıtty. Budan keıin aýyldyq aqsaqaldar alqasynyń tóraǵasy Nurǵazy Jasanov aq batasyn arnady. Ájeler shashý shashyp, saltanatty is-sharanyń shyraıyn odan ári asyrdy. Ákimdik ǵımaraty blokti-modýlden qurastyrylǵan. Nebári eki aıdyń ishinde boı kótergen nysan aýylǵa kórik berip tur. Ishinde aýyl ákiminiń jeke kabınetimen qatar mamandardyń jeke bólmeleri, kelgen turǵyndardy qabyldaıtyn arnaıy bólme jáne aýyldyq kitaphanaǵa da oryn bar. Osyndaı jaǵymdy jańalyqtyń kýási bolǵan aýyl halqy dán rızashylyqtaryn bildirip, jańa ǵımarattyń ishin aralap kórdi.
Jalpy, Kópbirlik aýyly aýdan ortalyǵy Úshtóbe qalasynan 180 shaqyrym jerde. Qyzylbalyq aýyldyq okrýgine qarasty bul aýylda 900-den astam halyq turady. Jergilikti turǵyndar sport nysanynyń iske qosylýyn asyǵa kútken edi. Merdiger kompanııa «Sheber Metall» JShS bul ekiqabatty ǵımarattyń qurylysyn 2023 jyly bastap, jýyrda paıdalanýǵa berdi. Jobanyń quny 150 mln teńgeni quraıdy. Qarjy oblystyq bıýdjetten bólingen.
О́ńir ákiminiń baspasóz qyzmetiniń málimetinshe, jańa sport nysanynyń aýmaǵy 240 sharshy metrdi quraıdy. Munda balalar men jasóspirimderdiń deneshynyqtyrý klýby qurylyp, sporttyń kúres, voleıbol, basketbol túrlerinen seksııalar jumys isteıdi. Sondaı-aq keshende 11 shtattyq birlikke sáıkes turaqty jumys orny ashylyp jatyr. Keshen zaman talabyna saı jabdyqtalǵan. Endi munda aýyl jastary men jasóspirimderiniń bos ýaqyttaryn tıimdi ótkizip, sportpen shuǵyldanýyna barlyq múmkindik bar.
Aqsý jerindegi qýanyshtyń da orny bólek. Kóshkental aýlynda kópten esigi jabyq turǵan Mádenıet úıi kúrdeli jóndeýden ótip, paıdalanýǵa berildi. Irgetasy 1958 jyly qalanǵan mádenı oshaqta talaı alqaly jıyn ótken. 60-jyldary Qapal aýdanynda mal basy myńǵyryp ósip, astyq qambaǵa syımaı, óńirdiń dańqy dúrkirep, odaqqa tanylǵan. Sol kezde Kóshkental aýlyndaǵy atalǵan Mádenıet úıi aýdan kóleminde Saban toı, Shopan toı ótetin bolǵan. Sondaı-aq jalpaq jurt jyldy qorytyndylaý úshin osynda jınalǵan.
Munda partııa, komsomol uıymdarynyń basqosýlary ótken. Keıingi birneshe jyl boıy Mádenıet úıiniń tozyǵy jetip, tóbesinen sý aǵyp, edeni tesilip, jylý qubyry qırap, jaramsyz bolǵan. Sodan amalsyz aýyl halqy jańa ǵımarattyń salynýyn kútken. Sóıtip, halyqtyń tilegi boıynsha nysannyń kúrdeli jóndeý jumysyna «Aýyl – el besigi» baǵdarlamasy aıasynda 310 mln 909 myń teńge bólingen. Memlekettik satyp alý sharty boıynsha «Molyqbaı Baısaquly atyndaǵy Aqsý aýdandyq mádenıet úıi» MKQK men «Azamat Qurylys» JShS arasynda 2023 jylǵy 22 aqpanda kelisimshart jasalynyp, qurylys jumysy bastalady.
Búginde kúrdeli jóndeý tolyq aıaqtalyp, tehnıkalyq materıaldar satyp alynyp, ádemi ǵımarat paıdalanýǵa daıyn tur. Aýyldaǵy Mádenıet úıinde 5 úıirme jumys isteıdi. Mádenı oshaqty birneshe jyldan beri basqaryp kele jatqan Syrym Joldyhanov memlekettik sharalardy atalǵan ǵımarattyń aldynda ótkizetinin jetkizdi.
«Shyny kerek, bul tyǵyryqtan shyǵýdyń joly edi. Aýa raıy san qubylǵanda kıiz úı tigip, shatyr tikken kúnder de bolǵan. Endi qyzyl kirpishten salynǵan, ekiqabatty Mádenıet úıi aýyldyń myńnan asa turǵynyna qyzmet etedi. Mádenı oshaqtyń kitaphanasy ýaqytsha basqa jerge kóshirilgen. Qorynda 16400 kitaby bar kitaphana jaryq, jyly, kebý zalǵa qaıtadan qonys tepti. Jańa ǵımaratta dabylqaqqysh, beınebaqylaý kameralary bar. Múmkindigi shekteýli turǵyndarǵa arnalyp pandýs ornatylǵan», deıdi S.Joldyhanov.
Alys aýyldarda osyndaı jaıdarman jańalyqtar jıi bolsyn degen tilegin joldaǵan halyqtyń sózi oryndy. Qazir óńirde bolashaǵy joq aýyldar kóbeıip keledi. Osyndaı nysandar sol aýyldy saqtap qalý úshin jasalǵan taǵy bir qadam dep uqtyq.
Jetisý oblysy
