«Erekshe múmkindikter ortalyǵynda» Astana qalasynyń ákimdigi «Deneshynyqtyrý jáne sport basqarmasynyń» qoldaýymen «Shoýdaýn» Soqyrlar ústel tennıs federasııasy» respýblıkalyq qoǵamdyq birlestigi tartysty týrnır ótkizdi. Federasııaǵa qarasty Astana qalalyq fılıalynda 40-qa jýyq úmitker dodaǵa túsip, baǵyn synady.
Kórý qabileti múlde semgen, týabitti kóziniń syrqaty bar jandar úshin «Shoýdaýn» zaǵıptar ústel tennıs ortalyǵynda ótken tartys sport jármeńkesi ispetti. Munda kelýshiler tek ústel tennısimen ǵana shuǵyldanyp qoımaı, sýret te salady, basqa da sport túrlerin meńgerip, salaýatty ómir saltyn qalyptastyrady. «Shoýdaýn» zaǵıptar ústel tennısi federasııasynyń prezıdenti Júzbaı Serik osy sport túriniń keń qanat jaıyp, qatysýǵa yqylasty azamattardyń shoǵyry qalyńdap jatqanyn aıtty.
«Álemniń 40-tan asa elinde shoýdaýn zaǵıptar ústel tennısi qarqyndy damyp, bir izge túsken. 2022 jyly federasııamyz qurylsa, búginde 16 oblysta fılıaldary jumys isteıdi. Elordada turatyn zaǵıp tennısshiler arasynda týrnır joǵary deńgeıde ótti. Qatysýshylardyń biliktiligi artyp kele jatqany qýantady», dedi J.Serik.
Federasııa prezıdenti saıysty uıymdastyrýdaǵy maqsat, kóz janarynan aıyrylǵan jandardyń qoǵamnan tysqary qalmaı eldiń órkendeýine, salamatty ǵumyr keshýdiń úlgisin kórsetýge ózindik úlesin qosa alatynyn kórsetý ekenin alǵa tartty.
«Kózim kórmeı qaldy dep adam ózin uıyqqa ıterip, ýaıymǵa salyna berýge bolmaıdy. Qoldyń shapshań qımyly arqyly jáne estý qabiletiniń nátıjesinde ústel tennısin oınaı alasyz. Federasııa atqaryp kele jatqan jumysqa aqparattyq qoldaý qashanda kerek. Qanshama úıde otyrǵan jandar tennıs úıirmesine jazylsa, bir ýaqyt sergıdi, sportpen shuǵyldanady, qan aınalymy jaqsarady. О́ziniń jigeri janyp, qaıratyn arttyra túsedi, erteńge degen senimdiligi joǵarylaıdy. Kórý qabiletinen aıyrylǵan jandar da qoǵamnyń ketigin bútindeýge quqyly, sportpen shuǵyldanýyna múmkindik bar», dedi J.Serik.
«Shoýdaýn» zaǵıptardyń ústel tennısinde qatysýshylar kózin perdemen tańyp oınaıtyndyqtan da ózindik qıyndyǵy bar. Jarys jeńimpazdary men júldegerlerine demeýshiler tarapynan baǵaly syılyqtar tartý etildi. Týrnırdi uıymdastyrýshylar elimizde kenje damyǵan sport túrine qoldaý nyǵaıyp, demeýshilik tanytamyn degen atymtaı jomart azamattardyń qatary artsa degen tilegin bildirdi. Sebebi shoýdaýn ústel tennısiniń qural-jabdyǵy qymbat. Ár oblystaǵy fılıaldyń jumysyn jandandyrýǵa qarajat qolbaılaý bolyp otyr eken.
