Foto: instagram.com/lenarybakina
Qazaqstannyń birinshi, álemniń tórtinshi raketkasy Elena Rybakına birinshi kezeńde rýmyn tennısshisi Elena Rýzeniń qarymyn baıqap, aıqyn basymdyqpen jeńdi. Al ekinshi aınalymda nemis tennısshisi Laýra Zıgemýndty 2 saǵat 14 mınýtta yǵystyrdy. Úshinshi kezeńde Elena dat qyzy Karolın Voznıaskııge qarsy oınap, eki sette jeńiske jetti. Buǵan deıin álemniń birinshi raketkasy atanǵan Karolın de qaıratty tennısshi. 8/1 fınaldyq tartysta asa kóp kúshin sarqı qoıǵan joq. Reseılik tennısshi Anna Kalınskaıa jaraqatyn jeleý etip ekinshi sette jarystan bas tartty. Shırek fınalda otandasymyz Ýkraına tennısshisi Elına Svıtolınanyń kúshin baıqap kóredi.
Taǵy bir otandasymyz Iýlııa Pýtınseva jarys jolynda sensasııalyq jeńis tirkedi. Alǵashqy aınalymda germanııalyq Anjelıka Kerberdi, ekinshi kezeńde cheh Katerına Sınıakovany úsh sette yǵystyrdy. Úshinshi kezeńde álemniń birinshi raketkasy polıak Iga Shventekke qarsy kortqa shyǵyp, aıbynynan da, aıbarynan da yqqan joq, kerisinshe, eki sette basym tústi. Biraq 8/1 fınaldyq tartysta latvııalyq Elena Ostapenkoǵa ese jiberip, Londondaǵy «úlken dýlyǵa» dodasyn aıaqtady. Degenmen de álemdik reıtıngte 35-satyda turǵan Pýtınsevanyń Shventekti eńserýi – orasan jetistik.
Elena Rybakına eki jyl buryn osy «Ýımbldon» týrnırinde top jardy, byltyr shırek fınalda Týnıs tennısshisi Ons Jaberge jol berip, jarysty aıaqtaǵan edi. Parıj jazǵy Olımpıadasynyń qarsańyndaǵy dúbirli doda qyzdarymyzdyń qaýqaryn tanytpaq.
